ភ្នំពេញ៖ ជាថ្មីម្តងទៀត ពលរដ្ឋរស់នៅក្នុងរាជធានីភ្នំពេញ បានឱ្យដឹងថា ការចាក់វ៉ាក់សាំងបង្កាជំងឺកូវីដ-១៩ ដូសជំរុញ នៅតាមខ្នងផ្ទះ និងទីប្រជុំជន ផ្តល់ភាពងាយស្រួលច្រើន ជាពិសេសអ្នកមិនទាន់ចាក់វ៉ាក់សាំង គឺអាចចាក់វ៉ាក់សាំងបានគ្រប់ៗគ្នា ដើម្បីទប់ស្កាត់ការចម្លងជំងឺកូវីដ។

ពលរដ្ឋរស់នៅរាជធានីភ្នំពេញ មកចាក់វ៉ាក់សាំងកូវីដដូសជំរុញ នៅវត្តចាក់អង្រែលើ នៅថ្ងៃទី២៥ខែ​មេសា​នេះ បានប្រាប់BTVឱ្យដឹងថា ការចាក់វ៉ាក់សាំងដូសជំរុញ ពិតជាសារៈសំខាន់​ណាស់ ដើម្បី​បង្កើនអង់ទីគ័រទប់ទល់នឹងការវាយលុកពីជំងឺកូវីដ-១៩។ លើសពីនេះ ពួកគាត់បង្ហាញការគាំទ្រ​យុទ្ធសាស្រ្ត​ចាក់វ៉ាក់សាំងកូវីដដូសជំរុញ នៅតាមខ្នងផ្ទះ និងទីប្រជុំជនដើម្បីបង្កើនភាពសាំក្នុង​សហគមន៍​បានច្រើន លើកលែងកាត្វកិច្ចពាក់ម៉ាស់ជាដើម។

សម្តេចតេជោហ៊ុន សែននាយករដ្ឋមន្ត្រីកម្ពុជា ថ្លែងក្នុងពិធីប្រគល់-ទទួល វ៉ាក់សាំងបង្ការជំងឺកូវីដ-១៩ ជាជំនួយរបស់រដ្ឋាភិបាល ​និងប្រជាជនអ៊ីតាលីជាង ១លានដូស នៅថ្ងៃទី២៥ ខែមេសានេះ បានគួសបញ្ជាក់ថា ​ការចាក់វ៉ាក់សាំងដូសទី៣ គឺជាកាតព្វកិច្ចតម្រូវតែម្តង ដោយកម្ពុជានៅសល់​មនុស្ស​ប្រមាណ៦លាននាក់ទៀត ដែលមិនទាន់ចាក់ដូសទី៣នៅឡើយ ខណៈពលរដ្ឋជាង​១លាននាក់​បានចាក់ដូសទី៤។

បច្ចុប្បន្នដំណើរការចាក់វ៉ាក់សាំងកូវីដ-១៩ ដូសជំរុញ​ ជូនប្រជាពលរដ្ឋមានល្បឿនលឿនគួរកត់​សំគាល់ ​បន្ទាប់ពីក្រុមគ្រូពេទ្យនៃក្រសួងសុខាភិបាល សម្ព័ន្ធគ្រូពេទ្យសហភាពសហព័ន្ធយុវជន​កម្ពុជា ក្រុមគ្រូពេទ្យស្ម័គ្រចិត្តសម្តេចវិបុលសេនាភក្តីសាយ ឈុំ រួមនិងក្រុមគ្រូពេទ្យនៃក្រសួងការពារ​ជាតិជាដើមនោះ បានស្ពាយវ៉ាក់សាំងទៅចាក់ដល់ខ្នងផ្ទះ ​និងទីប្រជុំជន​ ដែលប្រជាពលរដ្ឋរស់នៅ។ នេះបើតាមប្រសាសន៍​លោក​ជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និង​ជា​ប្រធានគណៈកម្មការចំពោះកិច្ចចាក់វ៉ាក់សាំងបង្កាជំងឺកូវីដ-១៩​ ក្នុងក្របខណ្ឌទូទាំងប្រទេស៕អត្ថបទ៖ទូច សោភ័ណ