កំពង់ស្ពឺ៖ លោក ទីន សុវណ្ណនី ប្រធានក្រុមការងារចុះជួយឃុំទួលសាលា ស្រុកបសេដ្ឋ ខេត្តកំពង់ស្ពឺ បានធ្វើការណែនាំដល់ក្រុមការងារចុះជួយភូមិទាំងអស់ ត្រូវចុះឱ្យដល់ខ្នងផ្ទះផ្ទាល់ ដើម្បីស្វែងយល់ពីសុខទុក្ខ និងដោះស្រាយរាល់ការលំបាកជូនពលរដ្ឋ ព្រមទាំងផ្សព្វផ្សាយពីសមិទ្ធផលគោលនយោបាយបក្ស ពង្រឹងសាមគ្គីភាព ពង្រីកសមាជិកថ្មី និងត្រៀមលក្ខណៈឆ្ពោះទៅកាន់ការបោះឆ្នោត ស្របតាមទិសដៅរបស់ថ្នាក់លើ ។

ការណែនាំនេះ បានធ្វើឡើងនាព្រឹកថ្ងៃទី១៣ ខែមិថុនា ឆ្នាំ២០២៦ ក្នុងឱកាសប្រកាសទទួលស្គាល់សមាជិក ក្រុមការងារគណបក្សប្រជាជនកម្ពុជា ចុះមូលដ្ឋានភូមិទាំង១៧ នៃឃុំទួលសាលា ស្រុកបសេដ្ឋ ខេត្តកំពង់ស្ពឺ ។

លោក ទីន សុវណ្ណនី បានលើកឡើងថា សមាជិកក្រុមការងារចុះមូលដ្ឋានភូមិមានតួនាទីសំខាន់ក្នុងការពង្រឹង ពង្រីកសមាជិកគណបក្ស ផ្សព្វផ្សាយគោលនយោបាយ សមិទ្ធផលរបស់គណបក្ស ពិសេសតាមដាននិងដឹងពីសុខទុក្ខ របស់ប្រជាជនក្នុងមូលដ្ឋាន ហើយត្រូវចុះជួបសំណេះសំណាលជាមួយពលរដ្ឋគ្រប់រូប ដោយមិនប្រកាន់បក្សពួក ឬនិន្នាការនយោបាយ ដើម្បីស្តាប់ការលើកឡើង និងតម្រូវការជាក់ស្តែង ក៏ដូចជាត្រូវរួមគ្នាគិត រួមគ្នាដោះស្រាយប្រកបដោយប្រសិទ្ធិភាពនិងប្រសិទ្ធិផលខ្ពស់ ។

ប្រធានក្រុមការងារចុះជួយឃុំទួលសាលា បានគូសបញ្ជាក់ថា ឯកឧត្តមឧបនាយករដ្ឋមន្ត្រី ហ៊ុន ម៉ានី ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តកំពង់ស្ពឺ បានលើកឡើងថា គណបក្សប្រជាជនកម្ពុជា គឺនៅជាមួយប្រជាជនគ្រប់កាលៈទេសៈ បម្រើប្រជាជនដោយឥតលក្ខខណ្ឌ ។ ដោយឈរលើមូលដ្ឋាននេះ និងសច្ចៈភាពនៃកិច្ចខិតខំរបស់ក្រុមការងារ ទើបធ្វើឱ្យប្រជាពលរដ្ឋនៅតែឱ្យតម្លៃនិងគាំទ្រឥតងាករេក្នុងការផ្តល់ឱកាសឱ្យគណបក្សប្រជាជនដឹកនាំប្រទេសបន្តទៀត ។

លោកបន្តថា ដូច្នេះដើម្បីឆ្លើយតបទៅនិងការជឿទុករបស់ប្រជាជន ក្រុមការងារទាំងត្រូវបន្តសកម្មភាពការងារឱ្យកាន់តែល្អ និងជាឧត្តមប្រយោជន៍ដល់ជាតិនិងប្រជាជន កែប្រែនូវចំនុចខ្វះចន្លោះ ពង្រឹងសាមគ្គីភាពផ្ទៃក្នុង កសាងសកម្មភាពចុះជួយមូលដ្ឋានជាប្រចាំ និងជំរុញការងារយុទ្ធសាស្ត្រ ដើម្បីឆ្ពោះទៅកាន់ការបោះឆ្នោត។ជាងនេះ ក្រុមការងារត្រូវរួមគិត រួមធ្វើ និងរួមទទួលខុសត្រូវ ដើម្បីឆ្លើយតបតម្រូវការប្រជាពលរដ្ឋឱ្យបានទាន់ពេលវេលា ៕

អត្ថបទ បាន សុខរិទ្ធិ