នៅថ្ងៃទី១២ ខែមិថុនា ឆ្នាំ២០២៦ លោក វរសេនីយ៍ឯក ស្រី ម៉ាច និងក្រុមការងារលេខាធិការដ្ឋាន តំណាងឱ្យ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងជា ប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្តកំពង់ឆ្នាំង បានអញ្ជើញចុះសួរសុខទុក្ខ និងប្រគល់ថវិកាបេឡាមរណៈសង្គ្រោះ ព្រមទាំងលិខិតចូលរួមរំលែកមរណទុក្ខ ជូនដល់គ្រួសារសពសមាជិកសមាគម ចំនួន ៣គ្រួសារ។

ក្នុងឱកាសនោះ ក្រុមការងារបាននាំយកថវិកាបេឡាមរណៈសង្គ្រោះសរុបចំនួន ១២លានរៀល ប្រគល់ជូនគ្រួសារសពសមាជិកសមាគមដែលបានទទួលមរណភាព ដោយក្នុងនោះមាន ១គ្រួសារ ស្ថិតនៅស្រុករលាប្អៀរ និង ២គ្រួសារ ស្ថិតនៅស្រុកសាមគ្គីមានជ័យ ខេត្តកំពង់ឆ្នាំង។

លោក វរសេនីយ៍ឯក ស្រី ម៉ាច បានពាំនាំនូវការផ្តាំផ្ញើសាកសួរសុខទុក្ខ និងការចូលរួមរំលែកមរណទុក្ខយ៉ាងក្រៀមក្រំពីសំណាក់ ឯកឧត្តម ស៊ុន សុវណ្ណារិទ្ធិ ជូនចំពោះក្រុមគ្រួសារសពទាំងអស់ ព្រមទាំងបានលើកទឹកចិត្តឱ្យក្រុមគ្រួសារខិតខំថែរក្សាសាមគ្គីភាព និងបន្តជីវភាពរស់នៅឱ្យបានប្រសើរឡើង។

ថវិកាបេឡាមរណៈសង្គ្រោះដែលបានប្រគល់ជូននាពេលនេះ គឺជាការយកចិត្តទុកដាក់ និងការចែករំលែកទុក្ខលំបាករបស់សមាគមអតីតយុទ្ធជន និងនិវត្តជនកម្ពុជា ក្នុងការជួយសម្រាលបន្ទុកដល់គ្រួសារសមាជិកដែលបានបាត់បង់សាច់ញាតិជាទីស្រឡាញ់៕ ដោយ ៖ ហុង វាសនា