ភ្នំពេញ៖ ក្រសួងអប់រំ យុវជន និងកីឡា អះអាងថា វិបត្តិកូវីដ-១៩ បានក្លាយជាឱកាសមួយសម្រាប់វិស័យអប់រំនៅកម្ពុជា កែប្រែពីការរៀននិងបង្រៀនបែបប្រពៃណី ឈានទៅការសិក្សាបែបឌីជីថល។ ការកែប្រែនេះ គឺលឿនជាងផែនការរបស់ក្រសួងអប់រំរហូតដល់ ១០ឆ្នាំ។ នេះជាការបញ្ជាក់របស់រដ្ឋមន្រ្តីក្រសួងអប់រំ យុវជន និងកីឡា។

បច្ចុប្បន្នការរៀន និងបង្រៀនក្នុងបរិបទកូវីដ-១៩ គឺកំពុងអនុវត្តនូវការសិក្សាបែបចម្រុះ ដោយផ្អែក​លើការ​សិក្សាតាមបែបប្រពៃណីជាការសិក្សាតាមថ្នាក់រៀន និងការសិក្សាបែបឌីជីថលដោយ​ប្រើប្រាស់​ប្រព័ន្ធ​បច្ចេកវិទ្យាផង។

វិបត្តិកូវីដកូវីដ-១៩ គឺជាឱកាសធ្វើឱ្យវិស័យអប់រំ ​នៅកម្ពុជាវិវត្តទៅការអប់រំបែបឌីជីថល លឿនជាង​ផែនការ​របស់ក្រសួងរហូតដល់ ១០ឆ្នាំ។ ទាំងនេះជាការបញ្ជាក់របស់ឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា ​ក្នុងឱកាសសន្និបាត​ បូកសរុបលទ្ធផលការងារ។

ឯកឧត្តម រដ្ឋមន្រ្តីក្រសួងអប់រំ ​បញ្ជាក់ថា ក្នុងវិបត្តិកូវីដ-១៩នេះ ក្រសួងអប់រំបានខិតខំ​ផលិត​ផ្សព្វផ្សាយ​វីដេអូបង្រៀន​ ការបង្កើតទូរទស្សន៍ ទទក ២ និងការផ្សព្វផ្សាយវីដេអូបង្រៀន លើ​ប្រព័ន្ធ​ផ្សព្វផ្សាយផ្លូវការជាច្រើន ​ដោយមានទាំងប្រព័ន្ធទំនាក់ទំនងសង្គម​ ហ្វេសប៊ុក យូធូប និងកម្មកវិធី​ទូរស័ព្ទជាដើម។

សម្រាប់ការអប់រំបែបឌីជីថលនេះ ឯកឧត្តម សភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រី​ក្រសួងសេដ្ឋកិច្ច ​និងហិរញ្ញវត្ថុ ​លើកឡើងជាការគាំទ្រថា​ ការអប់រំតាមបែបឌីជីថល គឺឆ្លើយតបយ៉ាង​ទៅនឹងក្របខណ្ឌគោលនយោបាយសេដ្ឋកិច្ច ​និងសង្គមឌីជីថលកម្ពុជា​ ឆ្នាំ ២០២១-២០៣៥ ។ ការប្រែក្លាយវិបត្តិទៅជាកាលានុវត្តភាពនាពេលនេះ​ ពិតជាមានសារៈសំខាន់ខ្លាំងណាស់ ដោយសារ​តែយុវជនយើងកំពុងត្រូវការសេវាអប់រំតាមបែបថ្មី,ទំនើប និងមានគុណភាពកម្រិតខ្ពស់ ជាពិសេស​នៅ​ពេលមានការកើនឡើងយ៉ាងឆាប់រហ័សនៃការប្រើប្រាស់បច្ចេកវិទ្យា ​និងប្រព័ន្ធអិនធើណិត​ជាដើម ។

ការអភិវឌ្ឍសមត្ថភាពរបស់សិស្ស,និស្សិត, យុវជន និងប្រជាជនទូទៅ ក្នុងការប្រើប្រាស់ និងទទួល​ផល​ពីបច្ចេកវិទ្យាទាំងនេះ​ គឺ​ជាកត្តាចាំបាច់ ​ដើម្បីធានានូវឧត្តមភាពប្រៀបធៀបរបស់កម្ពុជា នៅ​ក្នុងតំបន់ និងសកលលោក ។

ជុំវិញបញ្ហានេះ ឯកឧត្ដមឧបនាយករដ្ឋមន្រ្តី ​ គាំទ្រ​ដល់គំនិតផ្តួចផ្តើម​នៃការអប់រំតាមបែបឌីជីថល ដើម្បី​ពង្រឹងសមត្ថភាពផ្នែកអក្ខរកម្មឌីជីថលដល់សិស្ស, និស្សិត និងយុវជន ក្នុងគោលបំណង​ទាញ​ប្រយោជន៍ពីសេដ្ឋកិច្ចឌីជីថល ​និងធ្វើឱ្យយុវជនជំនាន់ក្រោយមានលទ្ធភាពគ្រប់គ្រាន់ ក្នុងការ​ទាញ​យកប្រយោជន៍ពីបច្ចេកវិទ្យាថ្មីៗ​ និងទីផ្សារឌីជីថល ៕