សៀមរាប៖ ឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ បានសម្តែងនូវការកោតសរសើរយ៉ាងខ្លាំងចំពោះក្រុមប្រតិបត្តិការបង្ក្រាប ដែលបានខិតខំបំពេញការងារប្រកបដោយប្រសិទ្ធភាពខ្ពស់។

ឯកឧត្តម បានលើកឡើងថា ស្របពេលដែលរាជរដ្ឋាភិបាលដកហូតនូវដីព្រៃលិចទឹក ជុំវិញបឹង​ទន្លេសាបផង ​ការសហការគ្នាអភិរក្សពូជត្រីផង ព្រមទាំងការខិតខំបង្ក្រាបបទល្មើសផងនោះ ទិន្នផលត្រីក្នុងបឹងទន្លេសាប​ នឹងមានការកើនឡើងវិញ ​ដើម្បីបំពេញតម្រូវការរបស់ពលរដ្ឋកម្ពុជា។

ឯកឧត្តម បានលើកឡើងបែបនេះ ក្នុងឱកាសដែលអញ្ជើញសាកសួរសុខទុក្ខកងកម្លាំង​ចម្រុះ​បង្ក្រាប​បទល្មើសនេសាទ ក្នុងបឹងទន្លេសាប ភូមិសាស្ត្រខេត្តសៀមរាប​ កាលពីថ្ងៃទី២៤មេសា ម្សិលមិញនេះ ។

ឯកឧត្ដម បានបន្ដថា ទោះបីជាផលត្រីក្នុងបឹងទន្លេសាប ​មិនអាចវិលទៅ​រកភាពដើមវិញ ក៏នៅ​ឆ្នាំខាងមុខ​គេរំពឹងថា ​ទិន្នផល​ក្នុងបឹងជង្រុកត្រីមួយនេះ ​នឹងមានការកើនឡើង។

គិតចាប់ពីថ្ងៃទី០១ដល់ថ្ងៃទី២៤ខែមេសានេះ ក្រុមសមត្ថកិច្ចចម្រុះដែលមានកម្លាំងរដ្ឋបាលជលផល​ខេត្តសៀមរាប ​កងកម្លាំងនគរបាល ​និងកងម្លាំងអាវុធហត្ថផ្ទៃប្រទេស បានចុះធ្វើការបង្ក្រាប​បទល្មើស​នេសាទបានចំនួន៦លើក ​ចាប់ខ្លួនជនល្មើសបាន៤នាក់​បញ្ជូនទៅតុលាការ ដកហូត និង​បំផ្លាញចោលនូវសម្ភារៈ ប្រព្រឹត្តិបទល្មើសបានមួយចំនួន។

របាយការណ៍ ​ក៏បានឲ្យដឹងថា ​ទន្ទឹមនឹងការបង្ក្រាបនេះ ​គេសង្កេតឃើញថា បទល្មើសនេសាទ​បាន​ថយចុះ ប្រជានេសាទ​មួយចំនួនធំពួកគាត់ក៏បានយល់អំពីការប្រើប្រាស់​ឧបករណ៍នេសាទត្រឹម៕ អត្ថបទ៖ ឈិត សាវី