ពោធិ៍សាត់៖ ឯកឧត្តម ស៊ុយ សែម ប្រធានក្រុមការងារគណបក្សប្រជាជនកម្ពុជា ចុះជួយខេត្តពោធិ៍សាត់ បានប្រកាសគាំទ្របង្កើតអោយមានវេទិការពិភាក្សាចែករំលែក​បទពិសោធន៍រវាងមនុស្សដែលមានវ័យចំណាស់ អ្នកបានចូលនិវត្តន៍ ជាមួយនិងយុវជន នៅតាមមូលដ្ឋានភូមិ ឃុំ ក្នុងស្រុកបាកាន ខេត្តពោធិ៍សាត់ ដែលបានផ្តួចផ្តើមគ្រោង និងបង្កើតដោយឯកឧត្តម ម៉េង ស័ក្កធារ៉ា ប្រធានក្រុមការងារគណបក្សប្រជាជនកម្ពុជា ចុះជួយស្រុកបាកាន ។

ឯកឧត្តម ស៊ុយ សែម ប្រកាសគ្រាំទ្រដូចនេះ ក្នុងកិច្ចប្រជុំបូកសរុប ការងារគណបក្សប្រជាជនកម្ពុជា​ស្រុកបាកាន និងកិច្ចប្រជុំបូកសរុបការងារយុវជនគណបក្សប្រជាជនកម្ពុជាស្រុកបាកាន ​នាថ្ងៃទី២៣ ខែមេសាឆ្នាំ២០២២ ដោយមានសមាជិកចូលរួមប្រមាណ៧០០នាក់ ដែលបានរៀបចំធ្វើ​នៅ​ទីស្នាក់ការ​គណបក្សប្រជាជនកម្ពុជាខេត្តពោធិ៍សាត់ ​ស្ថិតក្នុងសង្កាត់ព្រៃញី ​ក្រុងពោធិ៍សាត់ ។

វេទិការដែលគ្រោង និងបង្កើតឡើងនេះ ​គឺក្នុងគោលបំណង ចង់អោយយុវជនជំនាន់ក្រោយអាច​ទទួល​បាន​ពីបទពិសោធន៍ជីវិតពិតដែលមនុស្សចាស់ធ្លាប់​បានឆ្លងកាត់កន្លងមក ជាពិសេស​គឺ​បទពិសោធន៍​ជីវិត​កំសត់វេទនាក្នុងសម័យកាលដែលកម្ពុជា​ស្ថិតក្នុង​របប​ខ្មៅ​ងងឹត​កម្ពុជា​ប្រជាធិបតេយ្យប្រទេសជាតិត្រូវ​បំផ្លាញ​ខ្ទេចខ្ទី​ រហូតមាន​ការអភិវឌ្ឍ​លើគ្រប់វិស័យដូចបច្ចុប្បន្ន ទើបក្មូយៗ​ជាយុវជនអាចទទួល​បានការសិក្សារស់នៅក្នុងពេលប្រទេសជាតិ មាន​សន្តិភាព​មាន​ស្ថេរភាពនយោបាយ ​ប្រទេសជាតិមានភាព​សម្បូរសប្បាយ ។

វេទិកានេះ ក៏មានគោលដៅ ចង់សម្រួលអោយមនុស្សចាស់ ​និងយុវជនជំនាន់​ក្រោយអាចធ្វើការងារ​ជាមួយគ្នាបានដោយរលូន ព្រោះបច្ចុប្បន្នយើងសង្កេតឃើញថា តាមអង្គភាពការងារ ទាំងរដ្ឋនិង ឯកជន ហាក់កំពុងជួបវិបត្តិដោយមនុស្សចាស់​មួយចំនួន​ប្រកាន់គំនិត​អភិរក្សហួសហេតុ​ដោយ​មិនចង់ប្រគល់​ ការងារឲ្យ​យុវជន​ក្រោយឡើយ។ ​ចំណែកយុវជនជំនាន់ក្រោយខ្លះដែលអាង​លើ​សញ្ញាប័ត្រ ហាក់ដូចជា​មើលស្រាល​មនុស្សចាស់​ដែល​គ្មាន​សញ្ញាប័ត្រ​ស្មើនឹងខ្លួន ការមិន​ចុះ​សម្រុងគ្នានេះត្រូវគេមើលឃើញថា​ ជាវិបត្តិមួយ ​សម្រាប់សង្គមខ្មែរដែលត្រូវតែដោះស្រាយ។

សរុបជារួមទាំងមនុស្សចាស់ ​និងយុវជនគឺត្រូវការគ្នាទៅវិញទៅមក មនុស្សមានបទពិសោធន៍​ដែល​យុវជនគ្មាន ហើយយុវជនមានចំណេះដឹងនិងបច្ចេកទេសថ្មីៗ​ដែលមនុស្សចាស់ពុំមាន ដូចនេះ​បើរួមគ្នាបាន​ នឹងធ្វើអោយអង្គភាពរីកចម្រើន ​ប្រទេសជាតិរីកចម្រើន ។

ក្នុងកិច្ចប្រជុំនោះ ឯកឧត្តម ស៊ុយ សែម បានណែនាំអោយអោយក្រុមការងារគណបក្ស​ប្រជាជន​កម្ពុជា​ស្រុកបាកាន​ គ្រប់ជាន់ថ្នាក់ត្រូវតែបន្តយកចិត្តទុកដាក់​ចុះជួយប្រជាពលរដ្ឋ ចូលរួមជួយ​ធ្វើការ​អភិវឌ្ឍតាមមូលដ្ឋាន ​ហើយក្រុមការងារ​ និងសមាជិកគណបក្សស្រុកបាកាន​ទាំងអស់​និងរួមគ្នា​ឆ្ពោះទៅ​កាន់ជ័យជម្នះសម្រាប់ការបោះឆ្នោតក្រុមប្រឹក្សាឃុំ-សង្កាត់អាណ្តិទី៥​ ខាងមុខនេះ ៕

អត្ថបទ៖ ពៅ ភិរុណ