មេដឹកនាំ​រុស្ស៊ី លោក Vladimir Putin បានផ្ញើសារជូនពរថ្ងៃខួប​កំណើតទៅលោកប្រធានាធិបតីអាមេរិក លោក​ Donald Trump កាលពីថ្ងៃអាទិត្យ (ទី១៤ ខែមិថុនា ឆ្នាំ២០២៦) ដោយពណ៌នាអំពីរូបលោកថា ជា «បុគ្គល​ និងអ្នកនយោបាយដ៏ត្រចះត្រចង់​ និងអស្ចារ្យ​» ហើយបានលើក​ឡើង​ថា មេដឹកនាំទាំង២ អាចលើកកម្ពស់ទំនាក់ទំនងរបស់ប្រទេសរបស់ពួកលោកឲ្យ​ដល់កម្រិតថ្មីមួយ។

ក្នុងសារ​ជូនពររបស់លោក នៅលើគេហទំព័រវិមានក្រឹមឡាំង ដែលត្រូវ​បាន​ដកស្រង់ដោយទីភ្នាក់ងារសារព័ត៌មានរុស្ស៊ី លោក Putin បានសរសេរ​ថា «លោកប្រធានាធិបតី Donald (Trump) ជាទីស្រឡាញ់ ខ្ញុំសូមអបអរសាទរយ៉ាងស្មោះអស់​ពីចិត្ត​ ចំពោះអ្នក​ នៅថ្ងៃខួបកំណើតគម្រប់វ័យ​ ៨០​ឆ្នាំរបស់អ្នក! អ្នកគឺ​​ជាបុគ្គល​ និងជា​អ្នកនយោបាយដ៏ត្រចះត្រចង់​ និងអស្ចារ្យ​ណាស់​»។

ជាមួយ​គ្នានេះ បើ​យោងតាមលោក Yuri Ushakov បាន​ឲ្យ​ដឹង​ថា មេដឹកនាំរុស្ស៊ីស បានជជែក​ជាមួយ​លោក Trump តាមទូរស័ព្ទរយៈពេល ៥៥​នាទី។ ជំនួយការគោលនយោបាយការបរទេសរបស់វិមាន ក្រឹមឡាំងរូប​នេះ​ បានបញ្ជាក់​ថា លោក Putin បានជូនពរ​ថ្ងៃ​ខួប​កំណើរ​នេះតាមវិធី​​​ «ក្រៅផ្លូវការ» របស់លោក​។

សារជូនពររបស់លោក Putin បានបង្ហាញ​ថា លោក «ឲ្យតម្លៃដល់ការយោគយល់គ្នាទៅវិញទៅមក រវាងប្រទេស​ទាំង​២ ដែលអនុញ្ញាតឲ្យ​មេដឹកនាំ​នៃ​ប្រទេស​ទាំង២ ធ្វើការ​ពិភាក្សា សូម្បីតែលើ​បញ្ហាស្មុគស្មាញបំផុត ជុំវិញ​របៀបវារៈទ្វេភាគី និងអន្តរជាតិ ដោយបើកចំហ និងស្មោះត្រង់»។

គួរបញ្ជាក់ថា លោក Putin និង​លោក Trump បានជួបគ្នាចុងក្រោយនៅរដ្ឋ Alaska ​ក្នុងខែសីហា ឆ្នាំ​២០២៥ អំឡុង​ពេល​មាន​កិច្ចប្រឹងប្រែង ដើម្បីឈានដល់ដំណោះស្រាយនៃសង្គ្រាម ដែលធ្វើឲ្យអ៊ុយក្រែន​ប្រយុទ្ធ​ជាមួយ​រុស្ស៊ី​៕