​កាលពីថ្ងៃអាទិត្យ (ទី១៤ ខែមិថុនា ឆ្នាំ២០២៦) ក្នុងអំឡុងពេលធ្វើ​ទស្សនកិច្ច នៅសហរដ្ឋអាមេរិក ជាកន្លែងដែលលោកត្រូវបានគេរំពឹងថា នឹងធ្វើកិច្ចចរចាជាមួយមេដឹកនាំ លោក Donald Trump ប្រធានាធិបតីប៉ូឡូញ លោក Karol Nawrocki បាននិយាយថា «គោលបំណងយុទ្ធសាស្ត្រ» របស់ប្រទេសប៉ូឡូញ គឺវត្តមានយោធាអាមេរិកជា​អចិន្ត្រៃយ៍នៅលើទឹកដីរបស់ខ្លួន។​

ដោយ​បាន​និយាយ​អំឡុងពេលមាន​ដំណើរទស្សនកិច្ចរបស់លោក នៅ​ទីក្រុងវ៉ាស៊ីនតោនឌីស៊ី លោក Nawrocki បានបញ្ជាក់​ថា «ទាហានអាមេរិកមាន​កាន់តែច្រើននៅក្នុងប្រទេសប៉ូឡូញ គឺ​កាន់តែល្អ ដោយបន្ថែមថា វត្តមានយោធាអាមេរិកជាអចិន្ត្រៃយ៍ នៅតែជាគោលដៅដ៏​សំខាន់របស់ប៉ូឡូញ។ លោកបានអះអាងថា ទំនាក់ទំនងជិតស្និទ្ធ រវាងប្រធានាធិបតីប៉ូឡូញ និងសហរដ្ឋអាមេរិក គឺស្ថិតនៅក្នុងផលប្រយោជន៍ជាតិរបស់ប៉ូឡូញ។

គួរ​បញ្ជាក់​ថា ដំណើរទស្សនកិច្ចនេះកើតឡើងចំពេលមានការជជែកវែកញែកជាថ្មី​ អំពីអនាគតនៃវត្តមានយោធាអាមេរិកនៅតំបន់​អឺរ៉ុប។ កាលពីដើមឆ្នាំនេះ រដ្ឋបាលរបស់​លោក Trump បានពិនិត្យឡើងវិញនូវការដាក់ពង្រាយកម្លាំងអាមេរិក នៅទ្វីបអឺរ៉ុប ដែលធ្វើ​ឲ្យមាន​ក្ដី​បារម្ភកាន់តែ​ខ្លាំង​នៅទីក្រុងវ៉ាសូវី (Warsaw) ដែល​ថា ចំនួនកងទ័ពអាចត្រូវបានកាត់បន្ថយនៅទីបំផុត។

កង្វល់​ទាំងនោះបានធូរស្រាលនៅក្នុងខែឧសភា នៅពេលដែលលោក Trump បានប្រកាសថា សហរដ្ឋអាមេរិកនឹងដាក់ពង្រាយកងទ័ពបន្ថែមចំនួន ៥.០០០នាក់ នៅ​ប្រទេសប៉ូឡូញ ដោយលើកឡើងពីការចំណាយលើកាវិស័យ​រការពារជាតិរបស់ប្រទេសប៉ូឡូញ និងទំនាក់ទំនងរបស់លោកជាមួយលោក Nawrocki៕