បាត់ដំបង៖ មេឃុំកំពង់ល្ពៅ ស្រុកសំឡូត ខេត្តបាត់ដំបង បានបង្ហាញពីការប្ដេជ្ញាចិត្តក្នុងការរួមសុខរួមទុក្ខ បម្រើប្រជាពលរដ្ឋឱ្យបានល្អ និងអភិវឌ្ឍន៍មូលដ្ឋានឱ្យកាន់តែរីកចម្រើនជាបន្តបន្ទាប់។

ដើម្បីទទួលបានឱកាសបន្តបម្រើប្រជាពលរដ្ឋ លោក ឡាយ ហោម មេឃុំកំពង់ល្ពៅ ប្ដេជ្ញា​ពង្រឹង​សាមគ្គីភាព​ជាមួយសមាជិក សមាជិកា គណបក្សប្រជាជនកម្ពុជានៅមូលដ្ឋាន​ដើម្បី​ឈានទៅ​ដណ្ដើមជ័យជំនះក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដែលនឹង​ប្រព្រឹត្តទៅ​នៅខែមិថុនា ខាងមុខនេះ ។

បន្ថែមពីនេះ លោកមេឃុំបានប្រកាសគាំទ្រ ឯកឧត្តមបណ្ឌិត ហ៊ុន ម៉ាណែត ជា​បេក្ខភាព​នាយករដ្ឋមន្រ្តី​នាពេលអនាគត។

លោកមេឃុំ បានលើកឡើងបន្ថែមថា បន្ទាប់ពីសមាហរណកម្មឃុំកំពង់ល្ពៅ មានពលរដ្ឋតែ ៧៨គ្រួសារ​ប៉ុណ្ណោះ ប៉ុន្តែបច្ចុប្បន្ននេះ​បានកើនឡើងដល់ជាង ​២៣០០គ្រួសារ ។

ក្រោមការដឹកនាំរបស់គណបក្សប្រជាជនកម្ពុជា​បានធ្វើឱ្យឃុំនេះមានការអភិវឌ្ឍសាលារៀន មន្ទីរពេទ្យ ប្រព័ន្ធប្រឡាយ ​ផ្លូវខ្វាត់ខ្វែង ​ទាំងផ្លូវកៅស៊ូ និងគ្រួសក្រហមខណៈពលរដ្ឋភាគ​ច្រើន​ប្រកប​របរកសិកម្មជាចម្បង។

ឃុំកំពង់ល្ពៅ ស្រុកសំឡូតជាអតីតសមរភូមិក្ដៅ ដែលសំបូរទៅដោយគ្រាប់មីន និងគ្រាប់​យុទ្ធភណ្ឌ​មិនទាន់ផ្ទុះ។ ប៉ុន្តែសព្វថ្ងៃតំបន់អតីតសមរភូមិមួយនេះបានប្រែមុខមាត់ និងក្លាយមកជាតំបន់​អភិវឌ្ឍន៍​ប្រកប​ដោយសក្តានុពល​ ហើយ​ប្រជាពលរដ្ឋអាចរស់នៅ ​និងប្រកប​ការងារគ្រប់មុខរបរ ដើម្បី​លើកកម្ពស់ជីវភាព​រស់នៅប្រកបដោយសេចក្តីសុខសុភមង្គល៕ អត្ថបទ៖ នឿត​ សុភ័ក្ត្រ