លោក Keir Starmer នឹងចាប់ផ្តើមសប្តាហ៍ដ៏សំខាន់មួយ សម្រាប់តំណែងនាយករដ្ឋមន្ត្រីរបស់លោក ដោយការ​ប្រកាសពីកញ្ចប់នៃការរឹតបន្តឹងយ៉ាងតឹងរ៉ឹងដែលត្រូវបានបង្កើត​ឡើង ដើម្បីការពារក្មេងជំទង់អង់គ្លេស ពីការគំរាមកំហែងតាមប្រព័ន្ធ​អ៊ីនធឺណិត។

នាយករដ្ឋមន្ត្រីអង់គ្លេស ត្រូវបានគេរំពឹងថា នឹងបញ្ជាក់ពីការហាមឃាត់ក្មេងអាយុក្រោម ១៦​ឆ្នាំ មិន​ឲ្យ​ប្រើប្រាស់វេទិកាបណ្ដាញ​សង្គមសំខាន់ៗ នៅថ្ងៃចន្ទ (ទី១៥ ខែមិថុនា ឆ្នាំ២០២៦) នេះ​ ក៏ដូចជាវិធានការផ្សេងទៀត រួមទាំងការ​រឹតបន្តឹង​ សម្រាប់ក្មេងជំទង់ដែលមានវ័យចំណាស់ និងបទប្បញ្ញត្តិដ៏​តឹងរ៉ឹង ជុំវិញ​ការ​ប្រើ​ប្រាស់​កម្មវិធី​ Chatbot។

បន្ទាប់មក លោកនឹងចេញដំណើរទៅកាន់កិច្ចប្រជុំកំពូលនៃ​ក្រុមទាំងមាន​ឧស្សាហមម្ម​លូត​លាស់​ទាំង៧ (G7) នៅទីក្រុង​ Evian-les-Bains របស់​ប្រទេសបារាំង ជាកន្លែងដែលលោកត្រូវ​ប្រឈមនឹង​សំណួរពិបាក​ៗ បន្ទាប់ពីមាន​ការលាលែងពីតំណែងរបស់រដ្ឋមន្ត្រីក្រសួងការពារជាតិរបស់លោក កាលពីសប្តាហ៍មុន និងភាពមិនប្រាកដប្រជា ជុំវិញបញ្ហា​ថវិកាយោធារបស់ចក្រភពអង់គ្លេស។

ការហាមឃាត់មិន​ឲ្យ​ក្មេងវ័យ​ជំទង់ប្រើប្រាស់បណ្ដាញ​សង្គមនេះ ទទួល​ការ​គាំទ្រ​ពី​សាធារណជនអង់គ្លេស ទោះបីជាមានក្ដី​បារម្ភថា តើ​វា​អាចត្រូវបានអនុវត្តប្រកប​ដោយ​ប្រសិទ្ធភាព​ដែរ​ ឬយ៉ាង​ណាក៏ដោយ។ បើ​យោងតាមបុគ្គល​ម្នាក់ដែលដឹង​ពី​បញ្ហានេះ បាន​ឲ្យ​ដឹង​ថា ការរឹតបន្តឹងថ្មីរបស់រដ្ឋាភិបាលរបស់​គណបក្ស​ការងារ​ ក្នុង​នោះ​រួមទាំងការរឹតបន្តឹងមួយចំនួន លើ​កម្មវិធី Chatbot និងហ្គេមអនឡាផង​ដែរ​ នឹងមាន​លើសពីច្បាប់ នៅអូស្ត្រាលី ដែលការហាមឃាត់មិន​ឲ្យ​ប្រើ​ប្រាស់​បណ្ដាញ​សង្គមរបស់​ប្រទេស​នេះ​ សម្រាប់ក្មេងជំទង់ បានចូលជាធរមាននៅឆ្នាំ២០២៥។

លោក Starmer បានលើក​ឡើង​នៅក្នុងសេចក្តីថ្លែងការណ៍មួយកាលពី​យប់​ថ្ងៃទី១៤ ខែមិថុនាថា៖ «នេះគឺជាជម្រើសមួយ អំពីថា តើយើងឈរ​នៅខាងណា ដោយ​នោះគឺថា ឈរ​នៅ​ខាង​គ្រួសារនៅទូទាំងប្រទេស ឬស្ថានភាពបច្ចុប្បន្នដែលមិនផ្ដល់​ផល​ល្អ​»៕