រដ្ឋមន្ត្រីការពារជាតិអ៊ីស្រាអែលបាននិយាយនៅថ្ងៃចន្ទនេះថា កងកម្លាំងអ៊ីស្រាអែល នឹងបន្តស្ថិតនៅក្នុងប្រទេសលីបង់ ស៊ីរី និងតំបន់ហ្កាហ្សាដោយពុំកំណត់ពេលជាក់លាក់ ប៉ុន្មានម៉ោងបន្ទាប់ពីសហរដ្ឋអាមេរិក និងអ៊ីរ៉ង់បានយល់ព្រមបញ្ចប់សង្គ្រាមមជ្ឈិមបូព៌ា រួមទាំងនៅក្នុងប្រទេសលីបង់ផងដែរ។

លោក Israel Katz បាននិយាយនៅក្នុងសេចក្តីថ្លែងការណ៍មួយថា៖«លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) និងខ្ញុំកំពុងបន្តគោលនយោបាយច្បាស់លាស់មួយ ដែលកងកម្លាំងការពារអ៊ីស្រាអែល ( IDF) នឹងនៅតែស្ថិតនៅក្នុងតំបន់សន្តិសុខនៅក្នុងប្រទេសលីបង់ ស៊ីរី និងហ្កា ហ្សាសម្រាប់រយៈពេលគ្មានកំណត់ ដើម្បីការពារព្រំដែន និងសហគមន៍អ៊ីស្រាអែលពីទីនោះ ប្រឆាំងនឹងក្រុមគាំទ្រនៃក្រុមជីហាដ»។

លោក Katz ក៏បានព្រមានអ៊ីរ៉ង់ផងដែរថា ប្រសិនបើសាធារណរដ្ឋឥស្លាមវាយប្រហារអ៊ីស្រាអែល ដើម្បីឆ្លើយតបទៅនឹងយុទ្ធនាការរបស់ខ្លួននៅក្នុងប្រទេសលីបង់ អ៊ីស្រាអែលនឹងសងសឹកដោយ«កម្លាំងពេញទំហឹង»៕