រដ្ឋមន្ត្រីការបរទេសអ៊ីរ៉ង់ នៅ​ថ្ងៃចន្ទ (ទី១៥ ខែមិថុនា ឆ្នាំ២០២៦) នេះ បាននិយាយថា សហរដ្ឋអាមេរិកទទួលខុសត្រូវ ចំពោះការអនុវត្តអនុស្សរណៈនៃការយោគយល់គ្នា ដែលសម្របសម្រួលដោយប្រទេស​ប៉ាគីស្ថាន ជាមួយទីក្រុងតេអេរ៉ង់ ដោយអំពាវនាវឲ្យ​បញ្ឈប់ការវាយប្រហាររបស់អ៊ីស្រាអែល លើលីបង់។

ការ​លើកឡើង​នេះ បានកើតឡើងក្នុងអំឡុងពេលមាន​ការជជែក​តាម​ទូរស័ព្ទដាច់ដោយឡែកពីគ្នា​របស់លោក Abbas Araghchi ជាមួយរដ្ឋមន្ត្រីការបរទេសអ៊ីរ៉ាក់ លោក Fuad Hussein រដ្ឋមន្ត្រីការបរទេសអេហ្ស៊ីប លោក Badr Abdelatty និងរដ្ឋមន្ត្រីការបរទេសអារ៉ាប៊ីសាអ៊ូឌីត ព្រះអង្គម្ចាស់ ​ Faisal bin Farhan។ នេះបើយោងតាមទីភ្នាក់ងារសារព័ត៌មានរដ្ឋអ៊ីរ៉ង់ IRNA។

ទីភ្នាក់ងារសារព័ត៌មាននេះ បានបន្ថែមថា លោក Araghchi និងសមភាគីរបស់លោក ក៏បានសង្កត់ធ្ងន់ផង​ដែរ លើតម្រូវការក្នុងការរក្សាកិច្ចប្រឹងប្រែងផ្នែកការទូត ដើម្បីសម្រេចបាននូវស្ថិរភាព និងសន្តិសុខ នៅក្នុងតំបន់។

គួរបញ្ជាក់ថា ប្រធានាធិបតីអាមេរិក លោក Donald Trump បានប្រកាសកាលពីថ្ងៃអាទិត្យថា កិច្ចព្រមព្រៀងសន្តិភាពជាមួយអ៊ីរ៉ង់ ត្រូវបានបញ្ចប់សព្វគ្រប់​ហើយ​។ កិច្ចព្រមព្រៀងនេះ រួមមានការបញ្ឈប់សង្គ្រាមលើគ្រប់សមរភូមិ ក្នុង​នោះ​រួមទាំងប្រទេសលីបង់ផង​ដែរ ការបើកច្រកសមុទ្រ Hormuz ឡើងវិញ និងការបញ្ចប់ការបិទផ្លូវ​ទឹកដោយ​សហរដ្ឋអាមេរិកលើប្រទេសអ៊ីរ៉ង់៕