អង្គការសហប្រជាជាតិបាននិយាយនៅថ្ងៃចន្ទនេះថា អ៊ីរ៉ង់បានប្រហារជីវិតមនុស្សយ៉ាងហោចណាស់ ៤០ នាក់ ក្នុងនោះមានអ្នកតវ៉ាចំនួន ១៨នាក់ ដោយផ្អែកលើ «ហេតុផលសន្តិសុខជាតិ» ចាប់តាំងពីដើមឆ្នាំ ២០២៦។

លោក Volker Turk ប្រធានសិទ្ធិមនុស្សអង្គការសហប្រជាជាតិ បាននិយាយថា លោកមានអារម្មណ៍ «យ៉ាងជ្រាលជ្រៅចំពោះប្រជាជននៅក្នុងប្រទេសអ៊ីរ៉ង់ ដែលបានជាប់ខ្លួនរវាងសង្គ្រាម និងការគាបសង្កត់យ៉ាងឃោរឃៅ»។

លោកបានប្រាប់ក្រុមប្រឹក្សាសិទ្ធិមនុស្សUNថា ចាប់តាំងពីដើមឆ្នាំនេះមក អាជ្ញាធរអ៊ីរ៉ង់បានប្រហារជីវិតមនុស្សយ៉ាងហោចណាស់ ៤០នាក់ ដោយផ្អែកលើហេតុផលសន្តិសុខជាតិ... ក្នុងនោះមានអ្នកតវ៉ាចំនួន ១៨នាក់ ផងដែរ»។

លោក Turk ពិតជាព្រួយបារម្ភណាស់ថា ទីក្រុងតេអេរ៉ង់បានបង្កើនការគាបសង្កត់ ចាប់តាំងពីការបង្ក្រាបដ៏សាហាវលើការតវ៉ាកាលពីខែមករា បន្ថែមពីលើសង្គ្រាមមជ្ឈិមបូព៌ា ដែលបង្កឡើងកាលពីខែកុម្ភៈ ដោយការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់៕