អនុប្រធានាធិបតី លោក​ JD Vance បាននិយាយនៅ​ថ្ងៃចន្ទ (ទី​១៥ ខែមិថុនា ឆ្នាំ២០២៦) នេះ​ថា លោករំពឹងថា កិច្ចព្រមព្រៀង រវាងសហរដ្ឋអាមេរិក និងអ៊ីរ៉ង់ នឹងបើកច្រកសមុទ្រ Hormuz ដោយគ្មានប្រព័ន្ធគិតថ្លៃឆ្លង​កាត់​ សម្រាប់រយៈពេលវែង។

លោក Vance បានប្រាប់ប្រព័ន្ធផ្សព្វផ្សាយ​ CNBC ក្នុងបទសម្ភាសន៍មួយថា៖ «ការរំពឹងទុករបស់យើង គឺថា ច្រកសមុទ្រនេះ នឹងត្រូវបានបើកឲ្យធ្វើ​ចរាចរណ៍​ដោយមិនគិតថ្លៃ សម្រាប់រយៈពេលវែង ហើយនោះជារឿងដែលយើងនឹងដោះស្រាយនៅក្នុងការចរចាបច្ចេកទេសទាំងនេះ»។

ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍​ថា ច្រកសមុទ្រ Hormuz នឹងបើកឲ្យមាន​ការ​ដឹកជញ្ជូនដោយមិនគិតថ្លៃឆ្លង​កាត់​ សម្រាប់រយៈពេល ៦០​ថ្ងៃ។ បើយោងតាមទីភ្នាក់ងារសារព័ត៌មាន Tasnim របស់អ៊ីរ៉ង់ បាន​ឲ្យ​ដឹង​ថា​ ច្រកសមុទ្រនេះនឹងត្រូវបានគ្រប់គ្រងដោយអ៊ីរ៉ង់ និងអូម៉ង់ ក្រោយ​បញ្ចប់​រយៈពេលនោះ។

សហរដ្ឋអាមេរិក និងអ៊ីរ៉ង់ត្រូវបានគេរំពឹងថា នឹងចុះហត្ថលេខាលើកិច្ចព្រមព្រៀងមួយ ដើម្បីបញ្ចប់ជម្លោះ នៅ​ថ្ងៃសុក្រសប្ដាហ៍នេះ​ ក្នុង​ប្រទេសស្វីស។ លោក​ប្រធានាធិបតី Donald Trump បានបញ្ជាក់​ថា កិច្ចព្រមព្រៀងនេះបើកច្រកសមុទ្រ Hormuz ដោយមិនបង់​ថ្លៃឆ្លង​កាត់​ ជាថ្នូរនឹងការបញ្ចប់ការបិទផ្លូវទឹក ចំពោះ​អ៊ីរ៉ង់។

លោក Vance បាននិយាយថា ចរាចរណ៍នាវាឆ្លងកាត់ច្រកសមុទ្រ Hormuz បានកើនឡើងរួចហើយ ក្នុងរយៈពេល ២៤ម៉ោងកន្លងមកនេះ​។ តែ​យ៉ាង​ណាក្ដី​ ប្រព័ន្ធ​ផ្សព្វផ្សាយ​ CNBC មិនអាចផ្ទៀងផ្ទាត់ការអះអាងទាំងនោះបាន​ភ្លាមៗឡើយ​៕