​អេ​ឡិច​ត្រូ​និ​ច៖ ការប្រកួត​កីឡា​អេ​ឡិច​ត្រូ​និ​ច​លីគ​អាជីព​ដ៏​ធំ MPL-KH រដូវ​កាល​ឆ្នាំ​២០២២ វគ្គ Spring Split បាន​បញ្ចប់​ហើយក្រោយ​ដំណើរ​ការប្រកួត​វគ្គ​ពាក់កណ្ដាល​ផ្ដាច់ព្រ័ត្រ និង​វគ្គ​ផ្ដាច់ព្រ័ត្រ​រយៈពេល ២​ថ្ងៃដ៏​ស្វិតស្វាញកាល​ពី​ចុង​សប្ដាហ៍​កន្លងទៅ ដោយ​ក្រុម Impunity KH បាន​ក្លាយជា​ជើងឯកអម​ជាមួយ​ប្រាក់រង្វាន់ ១៦,០០០​ដុល្លារ បន្ទាប់ពី​យកឈ្នះ​ក្រុម​ខ្លាំង See You Soon ដោយ​លទ្ធផល ៣-០ នៅក្នុង​វគ្គ​ផ្ដាច់ព្រ័ត្រ​។​

​ក្រោយ​ចប់​ការប្រកួត​លោ​ក លន់ សាម​ឌី អគ្គលេខាធិការ​សហព័ន្ធ​កីឡា​អេឡិចត្រូនិក​កម្ពុជាបាន​គូសបញ្ជាក់ថា បន្ទាប់ពី​ឆ្លងកាត់​ការប្រកួត​ជាច្រើន​សប្ដាហ៍ លោក​សង្កេតឃើញថា ក្រុម​ចូលរួម​ប្រកួតប្រជែង MPL-KH ឆ្នាំនេះមាន​ភាព​រីកចម្រើន​កាន់តែខ្លាំងពិសេស​សន្ទុះ​អ្នកគាំទ្រ ដែល​ឆ្លុះបញ្ចាំង​ឲ្យ​ឃើញថា វិស័យ​កីឡា​អេឡិចត្រូនិក​ម្ពុ​ជាកំពុងមាន​ការអភិវឌ្ឍ​ន៍ និង​រីកចម្រើន​គួរ​ឲ្យ​កត់សម្គាល់។​ ​តាមរយៈ​នេះក្នុងនាម​សហព័ន្ធ លោក​បានធ្វើ​ការជំរុញ​ដល់​ក្រុម​ទាំងអស់ ទាំង​ក្រុម​ទទួលបាន​ជ័យលាភី និង​ក្រុម​ពុំ​ទទួលបាន​ជ័យលាភីត្រូវ​បន្ដ​ខិតខំ​ហ្វឹកហាត់ និង​អភិវឌ្ឍន៍​ខ្លួន​ឲ្យ​កាន់តែខ្លាំង ដើម្បី​ត្រៀម​ចូលរួម​ការប្រកួត​ទាំង​ថ្នាក់ជាតិ និង​អន្ដរជាតិ ពិសេស​ក្រុម​ជ័យលាភីដែល​នឹង​ទទួលបាន​ឱកាស​ចូលរួម​ប្រកួត​លើ​ឆាក​អន្ដរជាតិ​នាពេលខាងមុខ ដែល​ទាមទារ​ឲ្យ​យកចិត្តទុកដាក់ និង​បង្កើន​សមត្ថភាព​បន្ថែមទៀត។​

​សម្រាប់​ក្រុម​ជ័យលាភី​នៃ​ព្រឹត្តិការណ៍ MPL-KH វគ្គ Spring Split រដូវ​កាល​ឆ្នាំ​២០២២ នេះគឺ​ក្រុម​ជើងឯក Impunity KH បានទទួល​ប្រាក់រង្វាន់ ១៦,០០០​ដុល្លារ ខណៈ​ក្រុម​ជើងឯក​រង See You Soon ទទួលបាន​ប្រាក់រង្វាន់ ៨,០០០​ដុល្លារ ។ រីឯ​លេខ​៣ ក្រុម Team Max ទទួលបាន​ប្រាក់រង្វាន់ ៥,០០០​ដុល្លារ និង​លេខ​៤ ក្រុម Burn X Flash ទទួលបាន​ប្រាក់រង្វាន់ ៣,០០០​ដុល្លារ។ ចំណែក ៤​ក្រុម​ផ្សេងទៀតដែល​ឈានដល់​វគ្គ ៨​ក្រុម​ចុងក្រោយក៏​ទទួលបាន​ប្រាក់រង្វាន់​លើក​ទឹក​ចិ​ត្ដ​ក្នុង​មួយក្រុម ២​ពាន់​ដុល្លារ​ផងដែរ៕

​អត្ថបទ៖ លី ឈុន​ឡា