​រុស្ស៊ី៖ រុស្ស៊ី​បាន​ព្រមាន​សហរដ្ឋអាមេរិក​ទល់​នឹង​ការ​បញ្ជូន​គ្រឿង​សព្វាវុធ​បន្ថែម​ទៀត​ទៅ​អ៊ុយ​ក្រែ​ន ដោយ​និយាយ​ថា ​ការ​ដឹក​ជញ្ជូន​អាវុធ​នេះ​គឺ​ប្រៀប​ដូច​ជា​ចាក់​ប្រេង​លើ​អណ្ដាតភ្លើង​។ ​សហរដ្ឋអាមេរិក​បាន​ផ្ដល់​ជំនួយ​យោធា​គិត​ជា​ទឹកប្រាក់​ប្រហែល​ ៦,៤​ពាន់​លាន​​ដុល្លារ​អាមេរិកទៅកាន់​អ៊ុយ​ក្រែ​នចាប់​តាំង​ពី​ឆ្នាំ​២០១៤ ដែល​ក្នុង​នោះ​ទឹកប្រាក់ ៣,៧​ពាន់​លាន​ដុល្លារ​អាមេរិក​ត្រូវ​បែងចែក​ក្នុង​កញ្ចប់​ថវិកា​ជា​បន្តបន្ទាប់ ​ដែល​បាន​ប្រកាស​ក្រោយ​ការ​វាយ​លុក​របស់​រុស្ស៊ី លើ​ប្រទេសជិតខាង​របស់​ខ្លួន​ជាង ​២​ខែ​កន្លង​ទៅ​នេះ​។

​ប្រមុខ​ការទូត​អាមេរិក​លោក Antony Blinken និង​រដ្ឋមន្ត្រី​ការពារ​ជាតិ​អាមេរិក​លោក Lloyd Austin បាន​សន្យា​ផ្ដល់​ជំនួយ​យោធា​ក្នុង​ទំហំ​ទឹកប្រាក់​ចំនួន ៣២២​លាន​ដុល្លារ​អាមេរិកបន្ទាប់ពី​ជួប​ជាមួយ​ប្រធានាធិបតី​អ៊ុយ​ក្រែ​ន Volodymyr Zelenskyy ក្នុង​ទីក្រុង Kyiv​។​ ​នៅ​ក្នុង​ការ​អត្ថាធិប្បាយ​ដែល​បាន​ធ្វើ​ឡើង​នៅ​លើ​កញ្ចក់​ទូរទស្សន៍​ប៉ុស្តិ៍ Rossiya 24 លោក Anatoly Antonov ឯកអគ្គរដ្ឋទូត​រុស្ស៊ី​ប្រចាំ​នៅ​សហរដ្ឋអាមេរិក​បាន​និយាយ​ថា ការ​ដឹក​ជញ្ជូន​យុទ្ធោបករណ៍​ទៅ​ឲ្យ​អ៊ុយ​ក្រែ​ន​បង្កើន​ជម្លោះ​កាន់​តែ​រីក​ធំ ខណៈ​សង្គ្រាម​នេះ​បាន​ឈាន​ចូល​ដល់​ថ្ងៃ​ទី​៦១​។

​លោក Antonov បាន​និយាយ​ដោយ​សំដៅ​ទៅលើ​កំណត់​ទូត​ផ្លូវ​ការ ដែល​បាន​បញ្ជូន​ទៅ​ឲ្យ​ក្រុង Washington បង្ហាញ​ពី​ក្ដី​កង្វល់​របស់​ក្រុង Moscow ថា យើង​ពិតជា​មិន​អាច​ទទួលយក​ស្ថានភាព​បែប​នេះ​បាន​ទេ នៅ​ពេល​សហរដ្ឋអាមេរិក​ដឹកជញ្ជូន​អាវុធ​ចូល​ទៅ​ប្រទេស​អ៊ុយ​ក្រែ​ន ហើយ​យើង​ទាម​ទារ​ឲ្យ​បញ្ឈប់​សកម្មភាព​នេះ​។​ ទីបញ្ជាការ​យោធា​អ៊ុយ​ក្រែ​ន​បាន​និយាយ​កាលពី​ថ្ងៃ​ចន្ទ​ថា រុស្ស៊ី​កំពុង​ព្យាយាម​ទម្លាក់​គ្រាប់បែក​លើ​ហេដ្ឋារចនាសម្ព័ន្ធ​រថភ្លើង​របស់​អ៊ុយ​ក្រែ​ន ដើម្បី​រំខាន​ដល់​ការ​ដឹក​ជញ្ជូន​អាវុធ​ចូល​ពី​បរទេស​៕

អត្ថបទ៖ សុខមាន