កិច្ចប្រជុំកំពូលនៃ​ក្រុមប្រទេសមាន​ឧស្សាហកម្ម​លូតលាស់​ទាំង៧ (G7) បានចាប់ផ្តើម​ដំណើរការនៅថ្ងៃអង្គារ (ទី១៦ ខែមិថុនា ឆ្នាំ២០២៦) នេះ នៅទីក្រុង Evian របស់​ប្រទេសបារាំង ជា​ទី​ដែល​មេដឹកនាំពិភពលោកបានជួបជុំគ្នា ដើម្បីពិភាក្សាអំពីវិបត្តិ​សកល ដោយផ្តោតជាពិសេសលើបញ្ហាអ៊ីរ៉ង់ អ៊ុយក្រែន និងតំបន់​មជ្ឈិមបូព៌ា។

មេដឹកនាំ G7 មកពីប្រទេសបារាំង កាណាដា អាល្លឺម៉ង់ អ៊ីតាលី ជប៉ុន ចក្រភពអង់គ្លេស និងសហរដ្ឋអាមេរិក បានបើកថ្ងៃប្រជមុំ​ ដោយ​មាន​កិច្ចពិភាក្សាកម្រិតខ្ពស់ អំពីបញ្ហាអ៊ុយក្រែន ដែលក៏មានការចូលរួមពីប្រធានាធិបតីអ៊ុយក្រែន លោក Volodymyr Zelenskyy ផងដែរ។

ប្រធានាធិបតីអាមេរិក លោក Donald Trump ក៏បានទៅ​ដល់​ហើយ​​ដែរ កាល​ពី​ថ្ងៃចន្ទ សម្រាប់កិច្ចពិភាក្សាជាមួយមេដឹកនាំដទៃទៀត ហើយ​លោក​នឹង​មានវត្តមាន នៅក្នុងកិច្ចពិភាក្សា ស្ដីពី​អ៊ុយក្រែន។ មេដឹកនាំនៃសហភាពអឺរ៉ុប (EU) រួមទាំងប្រធានគណៈកម្មការអឺរ៉ុប លោកស្រី Ursula von der Leyen និងប្រធានក្រុមប្រឹក្សាអឺរ៉ុប លោក Antonio Costa ក៏មានវត្តមានផងដែរ។

កិច្ចប្រជុំបន្ទាប់​ ក៏នឹងផ្តោតផង​ដែរ​លើការអភិវឌ្ឍ នៅតំបន់​មជ្ឈិមបូព៌ា ក៏ដូចជាកំណើនសេដ្ឋកិច្ច និងបញ្ញាសិប្បនិម្មិត (AI)។ ក្រៅពី​ប្រធានាធិបតីអ៊ុយក្រែន ភ្ញៀវដែលត្រូវបានអញ្ជើញជាច្រើនរូប មកពីខាងក្រៅប្លុក​ G7 ត្រូវបានគេរំពឹងថា នឹងចូលរួមកិច្ច​ប្រជុំ​នេះ​ រួមទាំងនាយករដ្ឋមន្ត្រីឥណ្ឌា លោក Narendra Modi ប្រធានាធិបតីប្រេស៊ីល លោក Luiz Inacio Lula da Silva និងមេដឹកនាំកូរ៉េខាងត្បូង កេនយ៉ា និងអេហ្ស៊ីប​។

ហើយ​បណ្ដាមេដឹកនាំ​រដ្ឋ​ឈូងសមុទ្រ ក្នុង​ចំណោម​នោះ​ មាន​ព្រះចៅ Sheikh Tamim bin Hamad Al Thani នៃ​ប្រទេស​កាតា និង​ប្រធានាធិបតី​អេមីរ៉ាត​អារ៉ាប់រួម លោក Sheikh Mohamed bin Zayed Al Nahyan ក៏​ត្រូវ​បាន​គេ​រំពឹង​ថា ​នឹង​ចូលរួម​ផង​ដែរ៕