​ជប៉ុន៖ យោង​តាម​ក្រសួង​សុខាភិបាល ការងារ និង​សុខុមាលភាព​របស់​ប្រទេស​ជប៉ុន លោកយាយ Kane Tanaka ដែល​មាន​អាយុ​វែង​ជាងគេ​បំផុត​ក្នុង​ពិភពលោក បាន​ទទួល​មរណភាព​នៅ​ក្នុង​ប្រទេស​ជប៉ុនក្នុង​ជន្មាយុ ១១៩​ឆ្នាំ។ ​ក្រសួង​នេះ​និយាយ​ថា លោកយាយ Tanaka ដែល​បាន​កើត​នៅ​ថ្ងៃ​ទី​២ ​ខែ​មករា ​ឆ្នាំ១៩០៣ បាន​ស្លាប់​កាលពី​ថ្ងៃ​ទី​១៩ ខែ​មេសា ឆ្នាំ២០២២​។

​កំណត់ត្រា​ពិភពលោក Guinness World Records បាន​និយាយ​ថា ពួកគេ​សោកស្ដាយ​ខ្លាំង​ណាស់​ដែល​បាន​លឺ​ដំណឹង​មរណភាព​របស់​លោកយាយ Tanaka និង​បាន​និយាយ​ថា ដំណឹង​មរណភាព​របស់​លោកយាយ​ត្រូវ​បាន​បញ្ជាក់​ដោយ​ស្ថាប័ន​ពិគ្រោះ​ជំងឺ​មនុស្ស​ចាស់ Robert Young ដែល​បាន​ជួយ​បញ្ជាក់​ពី​កំណត់ត្រា​មនុស្ស​ចាស់​ជាងគេ​បំផុត ​នៅ​មាន​ជីវិត​នៅឡើយ​កាលពី​ឆ្នាំ​២០១៩​។ ​ក្រុម​អាជ្ញាធរ​ជប៉ុន​បាន​ប្រកាស​ថា លោកយាយ Tanaka បាន​ទទួល​មរណភាព​កាលពី​សប្ដាហ៍​មុន លោក​យាយ​ដែល​បាន​រស់​នៅ​ក្នុង​មណ្ឌល​ថែទាំ​មនុស្ស​ចាស់​ក្នុង​ទីក្រុង Fukuoka បាន​ទទួល​មរណភាព​នៅ​មន្ទីរពេទ្យ​កាលពី​ថ្ងៃ​អង្គារ​។

​តាមរយៈ​សារ​លើ​បណ្ដាញ​សង្គម Tweeter អំពី​មរណភាព​របស់​លោកយាយ ​កំណត់ត្រា​ពិភពលោក Guinness World Records បាន​និយាយ​ថា លោកយាយ​បាន​ក្លាយ​ជា​មនុស្ស​ចាស់​ជាងគេ​បំផុត​ ដែល​កំពុង​មាន​ជីវិត​នៅឡើយ​កាលពី​ខែ​មករា ឆ្នាំ២០១៩​ មាន​អាយុ​ ១១៦ឆ្នាំ និង ២៨​​ថ្ងៃ​។ ​លោកយាយ​ក៏​ជា​មនុស្ស​ទី​២ ​ដែល​មាន​អាយុ​វែង​ជាងគេ​បំផុត​ទី​២ ត្រូវ​បាន​កត់ត្រា​បន្ទាប់ពី​លោកយាយ Jeanne Calment ជនជាតិ​បារាំង​ដែល​​មាន​ជីវិត​រហូតដល់​អាយុ​ ១២២ឆ្នាំ​៕

អត្ថបទ៖ សុខមាន