ផ្លូវជនបទដែលស្ថិតក្រោមក្របខណ្ឌក្រសួងអភិវឌ្ឍន៍ជនបទ បានផ្តល់អត្ថប្រយោជន៍ គាំទ្រដល់ការអភិវឌ្ឍសេដ្ឋកិច្ច និងសង្គម សម្រួលដល់ការធ្វើដំណើរ និងការដឹកជញ្ជូនកសិផលរបស់កសិករ ការធ្វើអាជីវកម្ម និងពាណិជ្ជកម្មផ្សេងៗឆ្លងកាត់ពីតំបន់មួយ ទៅតំបន់មួយ។

ឯកឧត្តម សាន វិសាល រដ្ឋលេខាធិការតំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី ១៦ ខែមិថុនា ឆ្នាំ២០២៦នេះ ដឹកនាំគណៈកម្មការអន្តរក្រសួងរួមមាន ក្រសួងអភិឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃបញ្ចប់សុពលភាពលើការងារថែទាំខួបផ្លូវ១កំណាត់ ក្រាលកៅស៊ូ DBST បន្ថែមពីលើ (Reseal DBST) ប្រវែងជិត ៩ គីឡូម៉ែត្រ ទទឹង ៥ ម៉ែត្រ និងគូសគំនូសចរាចរណ៍ទំហំជាង ១,៧ ពាន់ម៉ែត្រការ៉េ ស្ថិតលើផ្លូវខ្ចាស់-ចាន់ស ឃុំខ្ចាស់ និងឃុំចាន់ស ស្រុកសូទ្រនិគម ខេត្តសៀមរាប។

ឯកឧត្តមរដ្ឋលេខាធិការ បានលើកឡើងអំពីសារៈសំខាន់ណាស់នៃបណ្តាញផ្លូវជនបទ ដែលស្ថិតក្រោមក្របខណ្ឌរបស់ អភិវឌ្ឍន៍ជនបទ បានកំពុងសម្រួលដល់ការធ្វើដំណើរ និងការដឹកជញ្ជូនកសិផលរបស់កសិករ ការធ្វើអាជីវកម្ម និងពាណិជ្ជកម្មផ្សេងៗ ដោយកំពុងបង្កើតសេដ្ឋកិច្ចនៅតាមមូលដ្ឋាន មានប្រាក់ចំណូល និងជីវភាពរស់នៅកាន់តែសមរម្យ ពោលគឺ មានបណ្តាញផ្លូវល្អ និង មានផ្លូវប្រទាក់ក្រឡាគ្នា គឺបានគាំទ្រដល់ការអភិវឌ្ឍសង្គម និងសេដ្ឋកិច្ច។ ឯកឧត្តមបានសង្កត់ធ្ងន់ថា ជុំវិញការអភិវឌ្ឍហេដ្ឋារចនា សម្ព័ន្ធនៅតាមជនជទនេះ ជាពិសេសការស្ថាបនាផ្លូវ និងស្ពាន ក្រសួងអភិវឌ្ឍន៍ជនបទបានយកចិត្តទុកដាក់បំផុត និងបានកំពុងបន្ត នូវបេសកម្មប្រកបដោយភាពបុរេសកម្ម។

ទាក់ទងការថែទាំផ្លូវវិញ, ឯកឧត្តមរដ្ឋលេខាធិការ បានវាយតម្លៃខ្ពស់ និងឯកភាពទទួលយក ចំពោះការខិតខំប្រឹងប្រែងថែទាំ ផ្លូវរបស់នាយកដ្ឋានផ្លូវលំជនបទ ដោយរក្សានូវគុណភាពផ្លូវបានល្អប្រសើរ សម្រាប់ជាប្រយោជន៍នៃការប្រើប្រាស់យូរអង្វែង ព្រោះផ្លូវ មានសារៈសំខាន់ណាស់ និងជាសរសៃរឈាមនៃសេដ្ឋកិច្ច មិនថានៅជនបទ ទីប្រជុំជន ឬនៅទីក្រុងឡើយ។ ឯកឧត្តមបានរំលេចថា ជុំវិញបញ្ហាហេដ្ឋរចនាសម្ព័ន្ធនៅតាមជនបទនេះ នៅក្នុងអាណត្តិទី ៧ នៃរដ្ឋសភា, រាជរដ្ឋាភិបាលកម្ពុជានឹងបន្តការ គាំទ្រដល់ការជួស ជុល ថែទាំផ្លូវ ស្ពាន និងស្ថាបនាផ្លូវនៅជនបទជាបន្តបន្ទាប់ ផ្សារភ្ជាប់ដល់ការធ្វើធុរកិច្ច និងការរស់នៅរបស់ប្រជាពលរដ្ឋកម្ពុជា៕

អត្ថបទ៖ សុន រ៉ាឌី