ភ្នំពេញ ៖ លោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌបានឱ្យដឹងតាមបណ្ដាញសង្គមនៅយប់ថ្ងៃទី១៦ ខែមិថុនា ឆ្នាំ២០២៦ថា ឃ្លាំងទំនិញធំៗ ចំនួន២ទីតាំង ឋិតនៅផ្លូវ៥៩៨ សង្កាត់ច្រាំងចំរេះទី២ ខណ្ឌឫស្សីកែវ រាជធានីភ្នំពេញ ដែលសង្ស័យមាននាំចូល និងចែកចាយទំនិញមកពីប្រទេសថៃ ហើយត្រូវបានបើកឃ្លុំ និងធ្វើការត្រួតពិនិត្យដោយមន្ដ្រីជំនាញពាក់ព័ន្ធកាលពីព្រឹកថ្ងៃទី១៥ ខែមិថុនា ឆ្នាំ២០២៦ ក្រោមកិច្ចសម្របសម្រួលដោយលោកស្រីព្រះរាជអាជ្ញារងអមសាលាដំបូងរាជធានីភ្នំពេញ គិតត្រឹមល្ងាចថ្ងៃទី១៦ ខែមិថុនា ឆ្នាំ២០២៦នេះ មានរយៈពេល២ថ្ងៃហើយ ដែលឃ្លាំងទំនិញទាំង២ទីតាំង ត្រូវមន្ដ្រីជំនាញចុះត្រួតពិនិត្យ។ ហើយល្ងាចនេះ ឃ្លាំងទាំង២ ត្រូវបានបិទឃ្លុំជាបណ្ដោះអាសន្នម្តងទៀត និងបន្តការត្រួតពិនិត្យនាវេលាថ្ងៃស្អែកជាបន្ត ដោយសមត្ថកិច្ចជំនាញ រួមមាន មន្ដ្រីគយ មន្ដ្រី ក.ប.ប និងកម្លាំងជំនាញពាក់ព័ន្ធ។

សូមជម្រាបថា ឃ្លាំងទំនិញធំៗចំនួន ២ មានម្ចាស់តែមួយ ស្ថិតនៅតាមបណ្តោយផ្លូវ ៥៩៨ នេះ កាលពីថ្ងៃទី១២ ខែមិថុនា ឆ្នាំ២០២៦ កម្លាំងចម្រុះបានចុះត្រួតពិនិត្យក្រោមការដឹកនាំ និងបញ្ជាផ្ទាល់របស់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ តាមការចុះត្រួតពិនិត្យជាក់ស្ដែងដោយលោក ជិន ប៊ុនធឿន អភិបាលខណ្ឌឫស្សីកែវ និងកម្លាំងចម្រុះ គឺមិនបានពិនិត្យរកឃើញទំនិញបង្កកនោះទេ ប៉ុន្តែបានរកឃើញផលិតផលដែលនាំចូលមកពីប្រទេសថៃជាច្រើនមុខ ដែលសង្ស័យពាក់ព័ន្ធករណីនាំចូល ស្តុកទុក ចរាចរ និងចែកចាយផលិតផលមានប្រភពពីប្រទេសថៃ គ្មានច្បាប់អនុញ្ញាត៕អត្ថបទ ៖ ប្រាក់ វ៉ាន់ដា