​មីយ៉ាន់ម៉ា៖ ប្រមុខ​យោធា​សហភាព​មី​យ៉ាន់​ម៉ា បាន​ចូលរួម​កិច្ចប្រជុំ​អន្តរជាតិ​តាម​អន​ឡាញ ​កាលពី​ថ្ងៃ​ព្រហស្បតិ៍​ម្សិលមិញ ជាមួយ​មន្ត្រី​យោធា​មកពី​សមាគម​ប្រជាជាតិ​អាស៊ី​-​អាគ្នេយ៍ ឬ​ហៅ​កាត់​ថា ​អាស៊ាន។​

​នាយ​ឧ​ត្ត​ម​សេនីយ៍ Min Aung Hlaing ដែល​ជា​ប្រធាន​ក្រុមប្រឹក្សា​រដ្ឋបាល​រដ្ឋ បាន​ចូលរួម​កិច្ចប្រជុំ​ប្រមុខ​កងកម្លាំង​ការពារ​ជាតិ​អាស៊ាន​លើក​ទី​១៨ ដែល​ត្រូវ​បាន​រៀបចំឡើង​តាម Video Conference។​ ​វា​គឺ​ជា​ការ​បង្ហាញខ្លួន​ដ៏​កម្រ​មួយ​របស់​លោក Aung Hlaing នៅមុខ​ជំនួប​អន្តរ​ជាតិបន្ទាប់ពី​រដ្ឋប្រហារ​កា​លពី​ខែ​មុន។​ ការ​ដណ្ដើម​គ្រប់គ្រង​អំណាច​ ដោយ​រដ្ឋប្រហារ​កា​លពី​ខែ​មុន ដែល​បាន​ទម្លាក់​រដ្ឋាភិបាល​របស់​លោកស្រី Aung San Suu Kyi បណ្ដាល​ឲ្យ​កើតមាន​បាតុកម្ម​ស្ទើរតែ​រាល់ថ្ងៃ និង​រង​ការ​បង្ក្រាប​យ៉ាង​ចាស់ដៃ​ពី​យោធា។​

​កងកម្លាំង​សន្តិសុខ​សហភាព​មី​យ៉ាន់​ម៉ា បាន​សម្លាប់​មនុស្ស​យ៉ាង​ហោច ២១៧​នាក់ចាប់​តាំង​ពី​មាន​រដ្ឋប្រហារ​កើតឡើង។​ រដ្ឋប្រហារ​នេះ​ដែរ បាន​ធ្វើ​ឲ្យ​យឺតយ៉ាវ​ដល់​ដំណើរការ​ឆ្ពោះ​ទៅ​រក ​លទ្ធិ​ប្រជា​ធិបតេយ្យ​នៅ​សហភាព​មី​យ៉ាន់​ម៉ា ដែល​ធ្លាប់​គ្រប់គ្រង​អំណាច​ដោយ​យោធា​អស់​រយៈពេល ​៥​ទសវត្សរ៍ និង​ធ្វើ​ឲ្យ​ប្រទេស​មួយ​នេះ​ធ្លាក់​ទៅ​ក្នុង​ភាព​ឯកា និង​រង​​ទណ្ឌកម្ម​អន្តរជាតិ៕

អត្ថបទ៖ សារ៉ាត់