​កូរ៉េខាងជើង៖ កូរ៉េខាងជើង​បាន​ធ្វើ​ព្យុហយាត្រា​យោធា​ក្នុង​ទីក្រុង Pyongyang ដើម្បី​រម្លឹក​ដល់​ការ​បង្កើត​កងទ័ព​របស់​ខ្លួន​ជា​ថ្ងៃ​ឈប់សម្រាក​ដ៏​ធំ​មួយ ខណៈ​ដែល​មេដឹកនាំ​លោក Kim Jong Un ប្ដេជ្ញា​បង្កើន​ការអភិវឌ្ឍអាវុធ​នុយក្លេអ៊ែរ​ដែល​ពិភពលោក​ហាមឃាត់​។

​សារព័ត៌មាន​រដ្ឋ​បាន​រាយការណ៍​នៅ​ថ្ងៃ​អង្គារ​នេះ​ថា ក្បួន​ព្យុហយាត្រា​ពេលយប់​នេះ​ក៏បាន​បង្ហាញ​ផង​ដែរ​ នូវ​មី​ស៊ី​ល​អន្តរទ្វីប​បាលី​ស្ទីក​ដ៏​ធំ និង​ថ្មី​បំផុត​របស់​កូរ៉េខាងជើង​គឺ Hwasong-17។ ​យោង​តាម​លិខិត​ដែល​បាន​ចេញ​ផ្សាយ ​ដោយ​ទីភ្នាក់ងារសារព័ត៌មាន​ផ្លូវការ​កណ្ដាល​រដ្ឋ​កូរ៉េខាងជើង ​KCNA លោក Kim បាន​និយាយ​ថា យើង​នឹង​បន្ត​បោះជំហាន​ពង្រឹង ​និង​អភិវឌ្ឍន៍​សមត្ថភាព​នុយក្លេអ៊ែរ​របស់​យើង​ក្នុង​សន្ទុះ​ដ៏​លឿន​បំផុត ស្រប​ពេល​លោក​បាន​សន្យា​ថា​នឹង​បន្ត​ពង្រឹងកម្លាំង​នុយក្លេអ៊ែរ​របស់​ប្រទេស​នេះ ទាំង​បរិមាណ និង​គុណភាព។​ លោក​បាន​បន្ថែម​ថា អាវុធ​នុយក្លេអ៊ែរ​របស់​កូរ៉េខាងជើង​គឺជា​និមិត្តរូប​នៃ​អំណាច​របស់​ប្រទេសជាតិ និង​គួរ​តែ​ត្រូវ​បាន​ពង្រីក​បន្ថែម​ឲ្យ​បាន​ច្រើន​ប្រភេទ​៕​

អត្ថបទ៖ សុខមាន