ភ្នំពេញ៖ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានជំរុញក្រុមហ៊ុនរថយន្តល្បីៗរបស់អាមេរិក ចូលមកវិនិយោគ និងបើកហាងលក់រថយន្តអគ្គិសនីនៅកម្ពុជា។

ការទាក់ទាញក្រុមហ៊ុនរថយន្តល្បីៗអាមេរិកនេះ គឺស្របពេលដែលរាជរដ្ឋាភិបាលកម្ពុជា កំពុងជំរុញការប្រើប្រាស់រថយន្តអគ្គិសនី ដើម្បីកាត់បន្ថយការចំណាយលើថ្លៃប្រេងឥន្ទនៈ របស់ប្រជាពលរដ្ឋ​ និងចូលរួមកាត់បន្ថយការបំពុលដល់បរិស្ថាន។

ថ្លែងក្នុងពិធីសម្ពោធដាក់ឱ្យប្រើប្រាស់ស្ថានីយ​បញ្ចូល​ថាមពលសម្រាប់យានយន្តអគ្គិសនី និង​ប្រេងឥន្ធនៈ កាល់តិចទី៥០ នៅថ្ងៃទី២៦ ខែមេសានេះ ឯកឧត្តម ស៊ុន ចាន់ថុល បានស្នើ​ដល់​អគ្គរដ្ឋទូត​សហរដ្ឋអាមេរិកប្រចាំនៅកម្ពុជា ឯកឧត្តម W. Patrick Murphy ជួយទាក់ទាញក្រុមហ៊ុន​រថយន្តធំៗរបស់អាមេរិក ដែលផលិតរថយន្តអគ្គិសនី ចូលមកកម្ពុជា។

ឯកឧត្តម ស៊ុន ចាន់ថុល៖ កំណើននៃការប្រើប្រាស់យានយន្តអគ្គិសនី​នៅកម្ពុជា ​បានកើនឡើងខ្ពស់ ឆ្លុះ​បញ្ចាំង​ពីការយល់ដឹងរបស់ប្រជាពលរដ្ឋ ​និងអ្នកប្រើប្រាស់ ​លើការប្រើប្រាស់រយន្តអគ្គិសនី និង​ការចូលរួមកាត់​បន្ថយការបំពុលដោយឧស្ម័នចេញពីយានយន្តដល់បរិស្ថាន។

ក្នុងរយៈពេលត្រីមាសទី១ ចំនួនរថយន្តអគ្គិសនី ចុះបញ្ជីនៅក្រសួងសាធារណការ​ និងដឹកជញ្ជូន បាន​កើនឡើង ៧០០ភាគរយ ​ពី៧គ្រឿងក្នុងត្រីមាសទី១ ឆ្នាំ២០២១ ដល់ ៤៧គ្រឿង ក្នុងត្រីមាសទី១ឆ្នាំនេះ។

សូមបញ្ជាក់ថា បច្ចុប្បន្ន មានស្ថានីយ​បញ្ចូលថាមពល​រថយន្តចំនួនពីរទីតាំង គឺនៅ​ក្រសួងសាធារណការ ​និងស្ថានីយប្រេងឥន្ទនៈ​ Caltex ​ខណៈបីទីតាំងផ្សេងទៀត គ្រោង​បើកដំណើរការនៅក្រុងព្រះសីហនុ ​បាត់ដំបង​ និងសៀមរាប៕ អត្ថបទ៖ វណ្ណៈ