ភ្នំពេញ៖ បន្ទាប់ពីឡើងការពារសេចក្តីព្រាងច្បាប់ស្តីពី​ សុវត្ថិភាពម្ហូបអាហារ ក្នុងកិច្ចប្រជុំជាមួយគណៈកម្មការជំនាញនៃរដ្ឋសភា ដើម្បីពិនិត្យ និងពិភាក្សាលើខ្លឹមសាររួចមក ក្រសួងពាណិជ្ជកម្ម នឹងដាក់បញ្ចូលសេចក្តីព្រាងច្បាប់នេះ ទៅក្នុងរបៀបវារៈសម័យប្រជុំពេញអង្គ នៃរដ្ឋសភានាពេលខាងមុខនេះ។

ក្នុងឱកាសដឹកនាំគណៈប្រតិភូក្រសួងពាណិជ្ជកម្ម អញ្ជើញចូលរួមកិច្ចប្រជុំជាមួយ​គណៈកម្មការ​ជំនាញ​នៃរដ្ឋសភា​ ដើម្បីការពារសេចក្តីព្រាងច្បាប់ស្តីពីសុវត្ថិភាពម្ហូបអាហារ​ កាលពីរសៀលថ្ងៃទី២៥ មេសា ឆ្នាំ២០២២កន្លងទៅ នៅវិមានរដ្ឋសភា ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បាន​លើកឡើងថា ច្បាប់ស្តីពីសុវត្ថិភាពម្ហូបអាហារចូលជាធរមាន នឹងបង្កើតបាននូវយន្តការគ្រប់គ្រង​ប្រតិបត្តិករអាជីវកម្មម្ហូបអាហារ​ នៅគ្រប់ដំណាក់កាលនៃខ្សែចង្វាក់ផលិតកម្ម ​និងធានាថា ផលិតផលម្ហូបអាហារដែលចរាចរនៅលើទីផ្សារកម្ពុជា​ មានគុណភាព សុវត្ថិភាព និងអនាម័យល្អ សម្រាប់ប្រជាពលរដ្ឋគ្រប់ៗរូប។

ច្បាប់នេះ ក៏នឹងកំណត់​លក្ខខណ្ឌ​តម្រូវជាមូលដ្ឋាន ​ដើម្បីជំរុញឱ្យផលិតផលម្ហូបអាហារ មាន​សុវត្ថិភាព គុណភាព និងស្របតាមស្តង់ដាកំណត់​ សំដៅធានាកម្រិត​ នៃការការពារអាយុជីវិត និង​សុខភាពប្រជាពលរដ្ឋ ធានាប្រសិទ្ធភាព ​នៃការការពារផលប្រយោជន៍អ្នកប្រើប្រាស់ រួមចំណែក​យ៉ាងសំខាន់ ក្នុងការកាត់បន្ថយភាពក្រីក្ររបស់ប្រជាពលរដ្ឋ និងជម្រុញឱ្យមានការអនុវត្តនូវវិធាន​ការអនាម័យ ​និងភូតគាមអនាម័យ​ ដើម្បីកាត់បន្ថយរបាំងបច្ចេកទេស ស្របតាមលក្ខខណ្ឌតម្រូវ​នៃ​ពាណិជ្ជកម្មម្ហូបអាហារអន្តរជាតិ ​ដែលជាវិធានការប្រកបដោយប្រសិទ្ធភាព សម្រាប់កម្ពុជារៀបចំ​ប្រព័ន្ធ​ត្រួតពិនិត្យម្ហូបអាហាររបស់ខ្លួន ដោយផ្អែកតាមគោលការណ៍អភិក្រមហានិភ័យ ដើម្បី​ទាក់ទាញ​វិនិយោគ ​ជំរុញប្រសិទ្ធភាពនៃការធ្វើពិពិធកម្មនាំចេញម្ហូបអាហារ និងធានាបាន​នូវការ​ប្រកួតប្រជែង​ប្រកបដោយសមធម៌និងយុត្តិធម៌។

ឯកឧត្តមរដ្ឋមន្រ្តី ក៏បានបញ្ជាក់ជូនអង្គប្រជុំបន្ថែមទៀត អំពីលក្ខណៈពិសេសនៃច្បាប់ស្តីពីសុវត្ថិភាព​ម្ហូបអាហារនេះ នឹងបង្កលក្ខណៈឱ្យប្រទេសកម្ពុជា រៀបចំនូវប្រព័ន្ធសុវត្ថិភាពម្ហូបអាហារ ដែលមាន​លក្ខណៈទំនើបតាមរយៈការកសាងវិធីសាស្រ្តទប់ស្កាត់ជាមុន និងការត្រួតពិនិត្យខ្សែចង្វាក់​ផលិតកម្ម​ ប្រសើរជាងការត្រួតពិនិត្យ ​និងវិភាគលើផលិតផលសម្រេច។

ច្បាប់នេះ នឹងអនុញ្ញាតឱ្យកម្ពុជាអាចទទួលយកនូវស្តង់ដាជាតិ និងអន្តរជាតិ ដើម្បីកំណត់​ជា​បទប្បញ្ញត្តិបច្ចេកទេស​ និងលក្ខខណ្ឌតម្រូវម្ហូបអាហារ ដើម្បីអនុវត្តនៅតាមខ្សែចង្វាក់ផលិតកម្មម្ហូប​អាហារ​ទាំងមូល​ ចាប់ពីដំណាក់កាលផលិតដំបូង ​ការកែច្នៃ ​ការដាក់លក់ រហូតដល់ការប្រើប្រាស់​ចុងក្រោយ ដែលជាគោលការណ៍មួយយ៉ាងសំខាន់ ក្នុងការជំរុញផលិតផលកម្ពុជា​ឱ្យមានការទទួល​ស្គាល់​ក្នុងទីផ្សារពិភពលោ‍ក៕ អត្ថបទ៖ ឈិត បូរ៉ាវី