​​ស្នូកឃ័រ​៖ ​កីឡាករ​ស្នូកឃ័រ​អូស្ត្រាលី Neil Robertson ដែល​ជា​បេក្ខភាព​ប្រជែង​ជើងឯក​ពិភពលោក​ឆ្នាំនេះ​បាន​ធ្លាក់​ចេញពី​ការប្រកួត​ហើយ បន្ទាប់ពី​ចាញ់​កីឡាករ​ម្ចាស់ផ្ទះ​អង់គ្លេស Jack Lisowski នៅ​ហ្វ្រេ​ម​កាត់សេចក្តី ១៣-១២​។ ​​កីឡាករ​វ័យ ៤០​ឆ្នាំ​រូប​នេះ​បាន​វាយ​មួយ​ឈើ​បាន​ពិន្ទុ​អតិបរមា ១៤៧ពិន្ទុ​ជា​លើក​ទី១២ ក្នុង​អាជីព​ដើម្បី​នាំមុខ ១១-១០ហ្វ្រេ​ម​លើ Lisowski​។​

​តែ​បន្ទាប់ពី​ហ្វ្រេ​ម​ដ៏​អស្ចារ្យ​របស់ Neil Robertson កីឡាករ​វ័យ ៣០ឆ្នាំ Jack Lisowski មិន​ខ្វល់​ឡើយ​ដោយបាន​យកឈ្នះ​ពីរ​ហ្វ្រេ​ម​ផ្ទួនៗ​។​ ​​ជ័យជំនះ​នេះ​ធ្វើឱ្យ​កីឡាករ​លំដាប់​លេខ ១៤ ពិភពលោក Jack Lisowski ត្រូវ​បន្ត​ជួប​ជាមួយ​កីឡាករ​ស្កុ​ត​ឡេ​ន John Higgins នៅ​វគ្គ ៨នាក់​ចុងក្រោយ​បន្ទាប់ពី Higgins បាន​យកឈ្នះ​កីឡាករ​ថៃ Noppon Saengkham ១៣-៧ហ្វ្រេ​ម​។ ​​សម្រាប់ Neil Robertson ការ​វាយ​មួយ​ឈើ​បាន ១៤៧ពិន្ទុ​អតិបរមា​នេះ​ក៏​ទទួលបាន​ប្រាក់រង្វាន់ ១៥,០០០ផោន​ផងដែរ​។​

​​ចំណែក​ការប្រកួត​ម្សិលមិញ​ផងដែរ ជើងឯក​ពិភពលោក​ឆ្នាំ២០១៩ Judd Trump បាន​កក់​កៅអី​នៅ​វគ្គ ៨នាក់​ចុងក្រោយ​បន្ទាប់ពី​យកឈ្នះ​កីឡាករ​ស្កុ​ត​ឡេ​ន Anthony McGill ១៣-៩ហ្វ្រេ​ម​។ ​​វគ្គ ៨នាក់​ចុងក្រោយ​នឹង​ប្រកួត​ចំនួន​ពីរ​គឺ​ថ្ងៃនេះ​ និង​ស្អែក​ដែល​រួមមាន Yan Bingtao ជួប Mark Williams, Stuart Bingham ជួប Judd Trump, Jack Lisowski ជួប John Higgins និង Stephen Maguire ជួប Ronnie O’Sullivan៕

​អត្ថបទ​៖​នាង សុភា​វុ​ធ