ខណៈថ្ងៃទី២០ ខែមិថុនាស្អែកនេះ ជាការរំលឹកខួប៤៩ឆ្នាំ ចំពោះ​វីរភា​ព​នៃ​ការ​លះ​បង់​របស់​សម្តេច​តេជោ ហ៊ុន សែន ដែលបានយក​ជីវិត​ធ្វើ​ដើម​ទុន​ក្នុង​ការ​រំដោះ​ប្រទេស​ជាតិ​ចេញ​ពី​របប​ប្រល័យ​ពូជ​សាសន៍ប៉ុលពត។ សហជីព កម្មករ និងកម្មការិនីរោងចក្រ បានគោរព​ដឹង​គុណ​ចំពោះ​ការ​លះបង់ដ៏ធំធេងរបស់សម្តេចតេជោ ក្នុងការតស៊ូពុះពារគ្រប់ឧបសគ្គទាំងអស់ ដែលនាំ​មក​នូវ​សន្តិភាព និងការអភិវឌ្ឍរហូតដល់សព្វថ្ងៃ។

លោក គឹម ចាន់សំណាង ប្រធានសភាសម្ព័ន្ធសហជីពជាតិកម្ពុជា (NACC) នៅព្រឹកថ្ងៃទី១៩ មិថុនា ឆ្នាំ២០២៦នេះ បានមានប្រសាសន៍ប្រាប់ព័ត៌មាន ប៊ីធីវី ឱ្យដឹងថា ក្នុងនាមជាពលរដ្ឋផង និងក្នុងនាមតំណាងកម្មករនិយោជិត បានយល់ដឹងច្បាស់អំពីតម្លៃនៃសុខសន្តិភាពដែលកើតមាននាពេលនេះ ខណៈដែលកន្លងមក កម្ពុជាបានឆ្លងកាត់ការឈឺចាប់ជូរចត់ជាច្រើនហូហែរស្ទើតែបាត់បង់ប្រទេសជាតិ។

លោកបានបន្តទៀតថា ចាត់តាំងពីការកកើតនៃការអភិវឌ្ឍន៍ប្រទេសជាតិរហូតមកដល់បច្ចុប្បន្នឃើញថា ការដឹកនាំរបស់សម្តេចតេជោ គឺមានការរីកចម្រើនច្រើន ក៏ប៉ុន្តែទន្ទឹមនឹងនេះ ក៏យើងរម្លឹកនូវអ្វីដែលជាការតស៊ូរបស់សម្តេចតេជោ ដែលលោកបានព្យាយាមក្នុងការចូលរួមរំដោះប្រទេសជាតិកម្ពុជាក្នុងរបបប្រល័យពូជសាសន៍ ង្កាលពីឆ្នាំ១៩៧៧ រហូតមកទល់ឆ្នាំ២០២៦នេះ គឺឃើញថាមានការរីកចម្រើន ជាពិសេសកត្តាសន្តិភាពតែម្តង ​ដែលធ្វើឱ្យប្រទេសកម្ពុជាមានការអភិវឌ្ឍជាបន្តបន្ទាប់ ប្រជាពលរដ្ឋមានមុខរបរ និងមានការងារធ្វើគ្រប់គ្រាន់ និងមានជីវភាពរស់នៅសមរម្យជាដើម ។

ក្រុមកម្មកររោងចក្រវិស័យកាត់ដេរសម្លៀកបំពាក់ ស្ថិតនៅតំបន់វេងស្រេង រាជធានីភ្នំពេញ បានលើកឡើងស្រដៀងគ្នាថា ទោះបីជាការកើតមិនទាន់ ឬឆ្លងកាត់ក្នុងរបបដ៏ខ្មៅងងឹតនោះក៏ពិតមែន តែក៏មិនអាចបំភ្លេចបាននូវការលះបង់ដ៏ធំធេងរបស់សម្តេចតេជោ ក៏ដូចជាឥស្សរជនខ្មែរជាច្រើដែលបានពលីជីវិត ប្តូរយកសន្តិភាព ការពារប្រទេសជាតិជូនជាតិមាតុភូមិ ដើម្បីប្តូរយកសន្តិភាព និងការអភិវឌ្ឍសម្រាប់ប្រទេសទាំងមូលផងដែរ។

ដើម្បីកុំឱ្យរបបនេះវិលត្រឡប់មកវិញ មេសហជីព ក៏ដូចជាកម្មករ កម្មការិនី បានប្ដេជ្ញាចូលរួមថែរក្សាការពារសន្តិភាពឱ្យបានគង់វង្ស ពីព្រោះសន្តិភាពបានផ្តល់ឱកាសគ្រប់យ៉ាងក្នុងការកសាងសង្គមគ្រួសារ សហគមន៍ និងប្រទេសជាតិឱ្យកាន់តែរីកចម្រើនទៅមុខទៀត៕ អត្ថបទ៖ ឈិត បូរ៉ាវី