នៅរដ្ឋធានីហាណូយ សាធារណរដ្ឋសង្គមនិយមវៀតណាម នៅថ្ងៃទី១៨ ខែមិថុនា ឆ្នាំ២០២៦នេះ នាយឧត្តមសេនីយ៍ គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា និងនិវត្តជនកម្ពុជា បានបន្តអញ្ជើញជួបសំណេះសំណាល និងពិភាក្សាការងារជាមួយថ្នាក់ដឹកនាំ និងសមាជិកនៃសមាគមមិត្តភាពរណសិរ្សភូមិភាគនិរតីកម្ពុជា។

នៅក្នុងជំនួបដ៏មានអត្ថន័យនោះ នាយឧត្តមសេនីយ៍ គន់ គីម បាននាំនូវការសាកសួរសុខទុក្ខ និងមនោសញ្ចេតនានឹករលឹកយ៉ាងជ្រាលជ្រៅពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនចំពោះបងប្អូនអតីតកងទ័ពស្ម័គ្រចិត្តវៀតណាមនៃសមាគមមិត្តភាពរណសិរ្សភូមិភាគនិរតីកម្ពុជាទាំងអស់។

ក្នុងជំនួបនេះ នាយឧត្តមសេនីយ៍ គន់ គីម បានសម្តែងនូវការកោតសរសើរចំពោះការរួមចំណែករបស់អតីតកងទ័ពស័្មគ្រចិត្តវៀតណាមដែលបានចូលរួមយ៉ាងសកម្មក្នុងបុព្វហេតុតស៊ូរំដោះប្រទេសជាតិ។

ភាគីទាំងពីរបានផ្លាស់ប្តូរយោបល់អំពីការពង្រឹងទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការរវាងអតីតយុទ្ធជនកម្ពុជា និងវៀតណាម ព្រមទាំងការថែរក្សាប្រវត្តិសាស្ត្រ និងបន្តផ្សព្វផ្សាយអំពីស្មារតីមិត្តភាព និងការជួយគ្នាទៅវិញទៅមករវាងប្រជាជន និងអតីតយុទ្ធជននៃប្រទេសទាំងពីរ៕