រដ្ឋមន្ត្រីការបរទេសបារាំង លោក Jean-Noel Barrot នៅ​ថ្ងៃសុក្រ (ទី​១៩ ខែមិថុនា ឆ្នាំ២០២៦)​នេះ បាននិយាយថា ប្រទេស​អ៊ីស្រាអែលត្រូវតែគោរពការប្តេជ្ញាចិត្ត ក្រោមក្របខ័ណ្ឌបទឈប់បាញ់ នៅលីបង់ និងអំពាវនាវឲ្យ​សហរដ្ឋអាមេរិកអនុវត្ត «សម្ពាធចាំបាច់ទាំងអស់» ដើម្បីធានាឲ្យ​បាននូវការអនុលោមតាម។

លោក Barrot បានប្រាប់ប្រព័ន្ធផ្សព្វផ្សាយ​ Franceinfo ថា «គោលការណ៍ដំបូងនៃកិច្ចព្រមព្រៀង គឺការបញ្ឈប់អរិភាព នៅ​គ្រប់សមរភូមិ រួមទាំងនៅលីបង់ផងដែរ» ដោយបាន​បន្ថែមថា ការអនុវត្តតម្រូវឲ្យ​មានការពិភាក្សាកម្រិតបច្ចេកទេសជាបន្តបន្ទាប់ បន្ទាប់ពីមាន​ការវិវត្តការទូតថ្មីៗ នៅតំបន់​អឺរ៉ុប។

លោកបានបញ្ជាក់​ថា អាទិភាពឥឡូវនេះ គឺធានានូវការអនុវត្តជំហានចុងក្រោយនៃកិច្ចព្រមព្រៀងយ៉ាងពេញលេញ រួមទាំងវិធានការទាក់ទងនឹងស្ថិរភាព និងការធានាសន្តិសុខ ក្នុងតំបន់។ លោក Barrot បានព្រមានថា បើគ្មានកិច្ចព្រមព្រៀងនេះ​ទេ តំបន់នេះប្រឈមនឹងអស្ថិរភាពយូរអង្វែង ដោយបន្ថែមថា កិច្ចព្រមព្រៀងនេះ គឺចាំបាច់ដើម្បីការពារការកើនឡើងនូវ​ភាព​តាន​តឹង​បន្ថែមទៀត និងផលប៉ះពាល់ដល់​សេដ្ឋកិច្ចដែលទាក់ទងនឹងផ្លូវថាមពល។

ជាមួយ​គ្នា​នេះ រូប​មន្ត្រី​រូប​នេះ​បានសង្កត់ធ្ងន់ថា បារាំងនឹងនៅតែចូលរួម ក្នុងកិច្ចប្រឹងប្រែងផ្នែកការទូត និងការសម្របសម្រួលជាមួយដៃគូអន្តរជាតិ ខណៈដែលការអនុវត្តកិច្ចព្រមព្រៀងនេះបន្តទៅមុខ។

គួរបញ្ជាក់​ថា ទីភ្នាក់ងារសារព័ត៌មានជាតិលីបង់ (NNA) បានរាយការណ៍ថា មនុស្សយ៉ាងហោចណាស់ ២៨នាក់ត្រូវបានសម្លាប់ និងជាច្រើននាក់ទៀតរងរបួស អំឡុង​ការវាយប្រហារតាមអាកាសជាបន្តបន្ទាប់របស់អ៊ីស្រាអែល នៅទូទាំងភាគខាងត្បូង​លីបង់ ចាប់តាំងពីព្រឹកថ្ងៃសុក្រនេះ​ ដែលជាការកើនឡើងនូវ​ភាព​តាន​តឹង​ដ៏អាក្រក់​បំផុត ចាប់តាំងពីសហរដ្ឋអាមេរិក និងអ៊ីរ៉ង់បានចុះហត្ថលេខាលើកិច្ចព្រមព្រៀង ដែលមានគោលបំណងបញ្ចប់សង្គ្រាមនៅលើសមរភូមិជាច្រើន ក្នុង​នោះ​រួមទាំងលីបង់ផងដែរ៕