កីឡា៖ ថ្នាក់ដឹកនាំ មន្ដ្រីកីឡា និងកីឡាករបានសម្ដែងការសាទរ និងរីករាយជាខ្លាំង ក្រោយរាជរដ្ឋាភិបាលដែលមានសម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានប្រកាសលើកលែងកាតព្វកិច្ចពាក់ម៉ាស់នៅតាមទីសាធារណៈនានាទូទាំងប្រទេស ទោះបីតម្រូវឲ្យពលរដ្ឋបន្ដពាក់ម៉ាស់នៅកន្លែងបិទជិតមានម៉ាស៊ីនត្រជាក់ក៏ដោយ។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC និងជាអគ្គលេខាធិការគណៈកម្មាធិការជាតិអូឡាំពិកកម្ពុជា បានបង្ហាញនូវសេចក្ដីសោមនស្សរីករាយជាខ្លាំង ចំពោះការទទួលបាននូវភាពកក់ក្ដៅមួយជំហានទៀត ក្រោមការគិតគូរ និងដឹកនាំដ៏ត្រឹមត្រូវរបស់សម្ដេចតេជោនាយករដ្ឋមន្ដ្រី ក្នុងការលើកលែងការពាក់ម៉ាស់ ដែលនឹងផ្ដល់នូវផលវិជ្ជមានសម្រាប់ការហ្វឹកហាត់ជំនាញរបស់កីឡាករ-កីឡាការិនី។ ទន្ទឹមជាមួយគ្នា មន្ដ្រីសហព័ន្ធកីឡាជាតិក៏ដូចជាកីឡាករ រួមមានលោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធ ក៏ដូចជាកញ្ញា ហេង ម៉ីជូ អគ្គលេខាធិការស្ដីទីសហព័ន្ធខ្មែរកីឡាអត្តពលកម្មស្ម័គ្រចិត្ត និងកីឡាករកីឡាការ៉ាតេជម្រើសជាតិកម្ពុជា ថេង គឹមឈា បានលើកឡើងស្រដៀងៗគ្នាជុំវិញការលើកលែងកាតព្វកិច្ចពាក់ម៉ាស់នេះថា ជាដំណើរឆ្ពោះទៅរកប្រក្រតីភាពឡើងវិញ ពិសេសផ្ដល់ភាពការងារក្នុងការហ្វឹកហាត់របស់កីឡាករ-កីឡាការិនីតែម្ដង។
គួរបញ្ជាក់ថា សម្ដេចតេជោ ហ៊ុន សែន បានប្រកាសលើកលែងកាតព្វកិច្ចពាក់ម៉ាស់នៅតាមទីសាធារណៈនានានៅទូទាំងប្រទេស ប៉ុន្តែតម្រូវឱ្យពលរដ្ឋបន្តពាក់ម៉ាស់នៅកន្លែងដែលការបិទជិត មានម៉ាស៊ីនត្រជាក់ជាដើមកាលពីព្រឹកថ្ងៃទី២៦ ខែមេសាម្សិលមិញ បន្ទាប់ពីទទួលយោបល់ពីកិច្ចប្រជុំអន្តរក្រសួងកាលពីថ្មីៗ ក្រោយរាជរដ្ឋាភិបាលសង្កេតឃើញថា អត្រាឆ្លងជំងឺកូវីដ-១៩ ក្នុងអត្រាទាបបំផុត ទោះបីជាកម្ពុជាបានអនុញ្ញាតឱ្យរៀបចំពិធីបុណ្យចូលឆ្នាំថ្មី ដោយមានប្រជាពលរដ្ឋជាច្រើនលេងកម្សាន្តដោយមិនមានការពាក់ម៉ាស់ ឬរក្សាគម្លាតក៏ដោយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
