អ្នកបរិស្ថានក្នុងស្រុកនិយាយថា ទីក្រុងទេសភាពដ៏ស្រស់ស្អាតនៅរដ្ឋភាគខាងជើង Himachal Pradesh ស្ថិតក្នុងតំបន់ភ្នំហេមពាន្ត ប្រទេសឥណ្ឌា រួមទាំងរដ្ឋធានី Shimla បានក្លាយជាគំនរសំរាម ដោយសារលំហូរភ្ញៀវទេសចរដ៏ច្រើន បង្កក្តីបារម្ភដល់ប្រព័ន្ធអេកូឡូស៊ីតំបន់ភ្នំដ៏ផុយស្រួយនេះ ។

រដ្ឋ Himachal Pradesh ស្ថិតក្នុងចំណោមគោលដៅទេសចរណ៍ដ៏ទាក់ទាញមួយនៅក្នុងប្រទេសឥណ្ឌា ធ្វើឲ្យទាក់ទាញភ្ញៀវទេសចររាប់លាននាក់ ជារៀងរាល់ឆ្នាំ ដោយសារនៅតំបន់នេះ សម្បូរទេសភាពតំបន់ភ្នំដ៏ស្រស់ស្អាត បរិយាកាសបរិសុទ្ធ សកម្មភាពផ្សេងព្រេង និងមរតកវប្បធម៌ ។

នៅទីក្រុង Shimla ដបប្លាស្ទិក ថង់ និងសំរាមជាច្រើនទៀត ត្រូវបានគេមើឃើញរាយប៉ាយពាសពេញជើងភ្នំ ។

លោក Pradeep Sangwan គឺជាអ្នកបរិស្ថាន និងជាស្ថាបនិកបង្កើតអង្គការក្រៅរដ្ឋាភិបាល Healing Himalayas និយាយថា សំរាមដែលកកកុញនៅទីនេះហូរចូលលូ បណ្តាលស្ទះលូ និងហូរចូលទន្លេ បង្កឲ្យមានសំរាមក្នុងសមុទ្រ រំខានដល់ជីវិតសត្វរស់នៅក្នុងទឹក ហើយនិងរួមចំណែកបង្កឲ្យមានទឹកជំនន់ផងដែរ ។

ក្រុមស្ម័គ្រចិត្តអង្គការ Healing Himalayas បាននាំគ្នាបោសសម្អាតសំរាម ប្រមូលកាកសំណល់ថង់ចេញពីជើងភ្នំ និងតាមដងផ្លូវ ។

ភ្ញៀវទេសចរដែលបានមកកម្សាន្តលេងតំបន់ភ្នំនេះដែរ បានបង្ហាញក្តីកង្វល់ដូចគ្នាចំពោះគំនរសំរាមទាំងនេះ ៕