ដោយអនុវត្តតាមបទបញ្ជាដ៏ម៉ឺងម៉ាត់របស់ ឯកឧត្ដម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្ដម ប៉េង ពោធិ៍សា អភិបាល នៃគណៈអភិបាលខេត្តស្វាយរៀង ស្តីពីការអនុវត្តយុទ្ធនាការ បង្ក្រាបបទល្មើសអនឡាញស្គេម នៅទូទាំងខេត្តស្វាយរៀង និងការដឹកនាំ​បញ្ជា​ផ្ទាល់​ពី​ លោក​ឧត្ដមសេនីយ៍​ទោ​ ពេជ្រ​ វីរៈ​ ស្នងការ​នគរបាល​ខេត្ត​ស្វាយរៀង​ កាលថ្ងៃទី១៨ ខែ​មិថុនា​ ឆ្នាំ​២០២៦​ លោក​វរសេនីយ៍ឯក​ គឹម​ ឡៃ​ និង​វរសេនីយ៍ឯក​ ឡាយ​ ចន្នី​ ស្នងការ​រង​នគរបាល​ខេត្ត​ បាន​ដឹកនាំ​កម្លាំង​នគរបាល​ សហការ​ជាមួយ​ កម្លាំង​នាយកដ្ឋាន​នគរបាលព្រហ្ម​ទណ្ឌ​ ដឹកនាំ​ដោយ​ លោក​ឧត្ដមសេនីយ៍​ទោ​ ប៉ុល​ រតនា​ អនុប្រធាន​នាយកដ្ឋាន​​ និងកម្លាំងគណៈបញ្ជាការឯកភាពរដ្ឋបាលក្រុងបាវិត​ ដឹកនាំ​ដោយ​លោក​ ម៉ែន​ ចាន់​រ៉ា​ អភិបាល​ក្រុង​បាវិត ដោយមានការសម្របសម្រួលនីតិវិធីពី​លោក​ស្រី​ ពៅ​ ទេវី ព្រះរាជអាជ្ញារង នៃ​អយ្យការ​អមសាលាដំបូងខេត្ត បានចុះ​ធ្វើ​ការ​ស្រាវជ្រាវ​ បង្រ្កាបទីតាំងសង្ស័យ លួចលាក់ប្រព្រឹត្តបទល្មើស ឆបោកតាមប្រព័ន្ធបច្ចេកវិទ្យា (Online Scams)​ នៅ​ចំណុច​វីឡា​ជួល​ ចំនួន​ ០៣ទីតាំង​​ ស្ថិត​នៅ​នៅ​ភូមិ​បាវិត​លេី​ សង្កាត់​បាវិត​ ក្រុង​បាវិត​ ដោយ​ឃាត់​ខ្លួន​មនុស្ស​ ក្នុង​រង្វង់​ប្រតិបត្តិការ​ចំនួន ៣២នាក់ ស្រី ០២នាក់ (ជនជាតិ​ចិន​ ២៣នាក់​ ស្រី​ ០១នាក់​,​ ជនជាតិ​វៀតណាម​ ០៩នាក់​ ស្រី​ ០១នាក់)។

ចាប់យកសម្ភារពាក់ព័ន្ធនឹងបទល្មើសរួមមាន៖ កុំព្យូទ័រលើតុ All-In-One ,​កុំព្យូទ័រ​យួរដៃ​ ,ម៉ូនី​ទ័រ​ ,ធុង​CPU​ ,រថយន្ត​,​ ថេប្លេត​,​ ទូរស័ព្ទដៃ និងសម្ភារប្រើប្រាស់មួយចំនួនទៀត។

បច្ចុប្បន្នជនសង្ស័យរួមទាំងវត្ថុតាង ត្រូវបានសមត្ថកិច្ចជំនាញ កំពុងកសាងសំណុំរឿងបញ្ជូនទៅសាលាដំបូងខេត្ត​ ដើម្បីចាត់ការតាមនីតិវិធីច្បាប់ រីឯ​ទីតាំង​ប្រព្រឹត្តិ​បទ​ល្មើស​ក្រុមការ​ងារបិទ​ជា​បណ្ដោះអាសន្ន​(Seal Off)៕