​បាល់ទាត់៖ ​ក្រុម​ជើងឯក​អង់គ្លេស Manchester City មាន​គ្រាប់​ចំណេញ​ ១​គ្រាប់​សំរាប់​ការប្រកួត​វគ្គ​ពាក់កណ្តាល​ផ្តាច់ព្រ័ត្រ UEFA Champions League ជើង​ទី២ បន្ទាប់ពី​ជើង​ទី១ ស៊ុត​បញ្ចូល​ទី​គ្នា ៧គ្រាប់​ដែល Manchester City យកឈ្នះ ៤-៣ នៅ Etihad​។

​

​ក្រុម​ម្ចាស់ផ្ទះ​ចាប់ផ្តើម​បានតែ ២នាទី​ក៏​នាំមុខ​មុន​ដោយ​ការ​តែ​ត​បញ្ចូល​ទី​របស់ Kevin de Bruyne ពី​ការបញ្ជូន​យ៉ាង​ល្អ​ពី Riyad Mahrez មុនពេល​ដែល Gabriel Jesus បន្ថែម​ការនាំ​មុខ ២-០ នៅ​នាទី​ទី​១១​។ ​ក្រុម​របស់លោក Pep Guardiola មានឱកាស​ច្រើន​ទៀត​តែ​មិនបាន​សំរេច មុនពេល​ដែល Karim Benzema តាម​បាន​មួយ​គ្រាប់​វិញ​ឱ្យ Real Madrid នៅ​នាទី​ទី៣៣​។ ​ឈានចូល​វគ្គ​ទី២ Mahrez ក៏មាន​ឱកាសល្អ​តែ​មិន​សំណាង​បាន​ត្រឹម​បុក​បង្គោល​ទី តែ​មិន​ថ្វី​ទេ Phil Foden ក៏​តែ​ត​បញ្ចូល​ទី​ឱ្យ Man City នាំមុខ ៣-១​។ ​បាន​ត្រឹម ២នាទី Vinicius Junior ក៏​តាម​ពីក្រោយ​មកវិញ ៣-២ ឱ្យ Real Madrid តែ Bernardo Silva ស៊ុត​បញ្ចូល​ទី​គ្រាប់​នាំមុខ ៤-២ នៅ​នាទី​ទី៧៤​។ ​Real Madrid ក៏​ទទួលបាន​បាល់​ពិន័យ ១១ម៉ែត្រ​មួយគ្រា​ប់​នៅ​នាទី​ទី៨២ ស៊ុត​សំរេច​ដោយ​ប្រើ​បច្ចេកទេស​របស់ Karim Benzema ដដែល​។

​​ក្រោយ​ចប់​ការប្រកួត​ឆ្លើយតប​នឹង​សំនួរ​អ្នកកាសែត​ដែល​សួរថា Manchester City គួរតែ​ឈ្នះ​ជាមួយ​នឹង​គំលាត​ច្រើន​គ្រាប់​ជាង​នេះ លោក Pep Guardiola និយាយថា លោក​មិនអាច​បន្ទោស​កូនក្រុម​ រឺ​ខ្លួន​នឹង​លទ្ធផល​បែបនេះ​ឡើយ អ្វីដែល​ធ្វើ​គឺ​ធ្វើ​អស់ហើយ ពួកយើង​នឹងធ្វើ​ដំណើរ​ទៅ​ទឹកដី Madrid ដើម្បី​ជ័យជំនះ​។ ចំណែក​លោក Carlo Ancelotti និយាយថា ក្រុម​របស់លោក​នៅមាន​សង្ឃឹម​នៅ​ឡើយ បើទោះជា​ចាប់ផ្តើម​មិនបាន​ល្អ ការពារ​មិនបាន​ល្អ តែ​ក្រោយមក​អ្វីៗ​បាន​កែប្រែ ហើយ​ជើង​ទី២ អ្វីដែល​ត្រូវ​កែ​ចំពោះមុខ​គឺ​ប្រព័ន្ធ​ការពារ​។ ​វគ្គ​ពាក់កណ្តាល​ផ្តាច់ព្រ័ត្រ​ជើង​ទី២ នៅ​ទឹកដី Real Madrid នឹងធ្វើ​ឡើង​នៅ​ថ្ងៃ​ពុធ​សប្តាហ៍​ក្រោយ​៕

​អត្ថបទ​៖​នាង សុភា​វុ​ធ