ភ្នំពេញ៖ អគារតេជោអភិវឌ្ឍន៍ នៃមន្ទីរពេទ្យកាល់ម៉ែត គិតត្រឹមព្រឹកថ្ងៃទី២៧ ខែមេសា ឆ្នាំ២០២២នេះ សម្រេចការសាងសង់បានជាង ៩២,០២ភាគរយ។

ឆ្លៀតក្នុងឱកាសដែលឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បាន​អញ្ជើញចុះពិនិត្យ និងវាយតម្លៃពីដំណើរការសាងសង់អគារតេជោអភិវឌ្ឍន៍ របស់​មនី្ទរពេទ្យ​កាល់ម៉ែត និងសំណេះសំណាលជាមួយឯកឧត្តម សាស្រ្តាចារ្យ ឈាង រ៉ា អគ្គនាយក​មនី្ទរពេទ្យ​កាល់ម៉ែត ព្រមទាំងបុគ្គលិកសុខាភិបាល នាព្រឹកនេះ​ បានថ្លែងថា នេះជាការអភិវឌ្ឍ​ដ៏ធំ​របស់​វិស័យសុខាភិបាល ក្រោម​កិច្ចដឹកនាំ ​និង​ឧបត្ថម្ភដ៏ខ្ពង់ខ្ពស់របស់សម្តេច​អគ្គមហាសេនាបតីតេជោ ហ៊ុន សែន នាយករដ្ឋមន្រី្ត ដើម្បីធ្វើឲ្យមនី្ទរពេទ្យកាល់ម៉ែត ប្រែក្លាយជាមនី្ទរពេទ្យមួយដ៏ទំនើប និងកាន់តែមានលក្ខណៈសម្បតិ្តគ្រប់គ្រាន់ ​ក្នុងការផ្តល់សេវាថែទាំសុខភាពជូនប្រជាពលរដ្ឋ ក៏ដូចជាមន្រី្ត បុគ្គលិក រហូតដល់ថ្នាក់ដឹកនាំជាន់ខ្ពស់ មិនឲ្យចាញ់បណ្តាប្រទេសដទៃ និង​ប្រទេសជិតខាងរបស់យើង ​ដែលមានលក្ខណៈជាអន្តរជាតិ។

ឯកឧត្តម សាស្រ្តាចារ្យ ម៉ម ប៊ុនហេង បានបញ្ជាក់ទៀតថា វិស័យវេជ្ជសាស្រ្តជាការងារ មួយដែល​ត្រូវសិក្សាស្រាវជ្រាវជារៀងរហូត​ ព្រោះថា​ជំងឺមានការវិវត្តន៍ថ្មីៗ និងរបៀបធ្វើ​រោគ​វិនិច្ឆ័យ​ក៏​វិវត្តន៍​ជាបន្តបន្ទាប់ ​ការព្យាបាលក៏ទាមទារឲ្យមានប្រសិទ្ធភាព ​និងការប្រើប្រាស់ឱសថ និង​បរិក្ខារវេជ្ជសាស្រ្ត​កាន់តែទំនើប ​និងកាន់តែមានប្រសិទ្ធភាពខ្ពស់។ ដូច្នេះគ្រូពេទ្យទាំងអស់ ត្រូវតែ​សិក្សាបន្ថែមជាប់ជានិច្ចទាំងក្នុងប្រទេស​ និងក្រៅប្រទេស និងការផ្លាស់ប្តូរបទពិសោធន៍គ្នា​រវាង​ប្រទេសនៅក្នុងតំបន់ ក៏ដូចជាអន្តរជាតិផងដែរ៕ អត្ថបទ រដ្ឋា