បាត់ដំបង៖ សក្ដានុពលយ៉ាងសំបូរបែបរបស់ស្រុកសំឡូតបានទាក់ទាញភ្ញៀវទេសចរយ៉ាងច្រើនកុះករទៅទស្សនាសម្រាកលំហែកម្សាន្តនៅតាមគោលដៅទេសចរណ៍នានាក្នុងស្រុកសំឡូតនៅក្នុងរដូវកាលបៃតង និងជារដូវកាលប្រមូលផលផ្លែឈើ ជាពិសេសផ្លែទុរេនសំឡូតដែលមានរសជាតិផ្អែមឆ្ងាញ់។

លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង បានឱ្យដឹងថា នៅអំឡុងពេលឈប់សម្រាកថ្ងៃបុណ្យ និងថ្ងៃចុងសប្ដាហ៍កន្លងទៅ មានបងប្អូនប្រជាពលរដ្ឋ និងភ្ញៀវទេសចរមកពីរាជធានី ខេត្ត សរុបប្រមាណជិត៤ម៉ឺនាក់សម្រុកទៅលេងនៅស្រុកសំឡូត ។

ជាមួយគ្នានេះ លោក ហ៊ុន ធឿន អភិបាលស្រុកសំឡូត បានបញ្ជាក់ពីការយកចិត្តទុកដាក់របស់អាជ្ញាធរស្រុកក្នុងការពង្រឹងការថែរក្សាការពារសន្តិសុខសណ្ដាប់ធ្នាប់ដើម្បីផ្ដល់ភាពកក់ក្ដៅជូនដល់បងប្អូនប្រជាពលរដ្ឋ និងភ្ញៀវទេសចរដែលអញ្ជើញមកកម្សាន្តនៅស្រុកសំឡូត។

លោក ហ៊ុន ធឿន បានសង្កត់ធ្ងន់បន្ថែមថា ក្រោមការណែនាំរបស់ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង ក្រុមការងារស្រុកតែងតែចុះពិនិត្យការលក់ដូរផ្លែទុរេនជាប់ជាប្រចាំដើម្បីណែនាំដល់អាជីវករ និងម្ចាស់ចំការដែលមានតូបលក់មុខផ្ទះឱ្យដាក់ឈ្មោះម្ចាស់ចំការ និងលេខទូរសព្ទក្នុងការផ្ដល់ទំនុកចិត្តដល់អតិថិជន និងភ្ញៀវទេសចរដែលមកកម្សាន្តក្នុងភូមិសាស្រ្តស្រុកសំឡូត និងចង់ភ្លក្សរសជាតិទុរេនសំឡូតពិតៗ។

លោក ហ៊ុន ធឿន គូសបញ្ជាក់ថា ទន្ទឹមនឹងការចុះត្រួតពិនិត្យជាប្រចាំ អាជ្ញាធរស្រុកបានសំណូមពរដល់អាជីវករឱ្យជួយបន្តទប់ស្កាត់ការនាំចូលទុរេនពីក្រៅប្រទេស និងដាក់ស្លាកប្រភពចំការ និងលេខទូរស័ព្ទឱ្យបានច្បាស់លាស់ដើម្បីរក្សាគុណតម្លៃ និងកេរ្តិ៍ដ៏ល្បីល្បាញរបស់ទុរេនសំឡូត។

សូមជម្រាបថា ជាអតីតតំបន់សមរភូមិក្ដៅ ស្រុកសំឡូត គឺជាស្រុកមួយនៅតំបន់ជាយដែនកម្ពុជា-ថៃ ក្នុងភូមិសាស្រ្តខេត្តបាត់ដំបងដែលមានសក្ដានុពលខ្ពស់លើវិស័យកសិកម្ម និងទេសចរណ៍ហើយបាននិងកំពុងមានការអភិវឌ្ឍន៍រីកចម្រើនប្រែមុខមាត់ថ្មីគួរឱ្យកត់សម្គាល់ទាំងផ្នែកហេដ្ឋារចនាសម្ព័ន្ធផ្លូវថ្នល់ អគ្គិសនី សាលារៀន និងមន្ទីរពេទ្យជាដើម៕ភ័ត្រ្ត បាត់ដំបង