នគរបាល​ហ្វីលីពីន នៅថ្ងៃចន្ទ (ទី២២ ខែមិថុនា ឆ្នាំ២០២៦) នេះ បាន​ឲ្យ​ដឹង​ថា មនុស្ស ៣នាក់ បានបាត់បង់ជីវិត​ និង ៥នាក់ទៀត​រងរបួស ដោយសារ​ការបាញ់ប្រហារ ក្នុង​សាលារៀន នៅភាគ​កណ្តាលនៃ​ប្រទេសហ្វីលីពីន។

នគរបាល​បានបញ្ជាក់ថា ជនសង្ស័យម្នាក់ត្រូវបានចាប់ខ្លួន និងម្នាក់ទៀតនៅតែរត់គេចខ្លួន បន្ទាប់ពី​មាន​ការបាញ់ប្រហារ នៅវិទ្យាល័យជាតិ San Jose ក្នុងទីក្រុង Tacloban ខេត្ត Leyte។

ការបាញ់ប្រហារនេះបានកើតឡើងនៅម៉ោងប្រហែល ៩​ព្រឹក (ម៉ោង​ក្នុងស្រុក) នៅខាងក្នុងសាលា នៅតំបន់​ Barangay San Jose ក្នុង​ទីក្រុង Tacloban។ ការិយាល័យនគរបាល​ក្រុង Tacloban កំពុងធ្វើ​ការ​ស៊ើបអង្កេត ដើម្បីកំណត់មូល​ហេតុ​ពិតប្រាកដ នៅពីក្រោយហេតុការណ៍នេះ។ ជនរងគ្រោះត្រូវបានបញ្ជូនទៅមណ្ឌលសុខភាពក្បែរនោះ ដើម្បីទទួល​ការ​ព្យាបាល។

ការិយាល័យនគរបាល​តំបន់លេខ៨ បានដាក់ពង្រាយបុគ្គលិកបន្ថែមនៅសាលារៀននេះ ដើម្បីធានាសុវត្ថិភាពរបស់សិស្ស បុគ្គលិក ឪពុកម្តាយ និងសហគមន៍ជុំវិញ។ ហើយ​អាជ្ញាធរបានជំរុញឲ្យ​សាធារណជនកុំផ្សព្វផ្សាយព័ត៌មានដែលមិនទាន់បានផ្ទៀងផ្ទាត់ និងសហការជាមួយអ្នកស៊ើបអង្កេត៕