ក្រុមចរចាជាន់ខ្ពស់មកពីអ៊ីរ៉ង់ និងសហរដ្ឋអាមេរិក កំពុងស្ថិតនៅក្នុងប្រទេសស្វីស ដើម្បីជំរុញអនុស្សរណៈយោគយល់ដែលបានចុះហត្ថលេខារួច ដើម្បីបញ្ចប់សង្រ្គាមដែលបង្កឡើងដោយសារការវាយប្រហាររបស់សហរដ្ឋអាមេរិក និងអ៊ីស្រាអែលកាលពីចុងខែកុម្ភៈ ។

ទោះបីជាយ៉ាងណាក៏ដោយ គោលជំហរអនុស្សរណៈយោគយល់របស់មេដឹកនាំកំពូលអ៊ីរ៉ង់លោក Mojtaba Khamenei បង្កឲ្យមានការជជែកដេញដោល ។

ប្រធានសភាលោក Mohammad Bagher Ghalibaf និងលោករដ្ឋមន្រ្តីការបរទេស Abbas Araghchi បានដឹកនាំគណៈប្រតិភូអ៊ីរ៉ង់នៅកិច្ចប្រជុំកម្រិតខ្ពស់កាលពីថ្ងៃអាទិត្យ ដែលសម្របសម្រួលដោយប៉ាគីស្ថាន និងកាតា ក្នុងនោះលោកអនុប្រធានាធិបតី JD Vance ដឹកនាំគណៈប្រតិភូសហរដ្ឋអាមេរិក ។

ប៉ុន្តែនៅទីក្រុងតេអេរ៉ង់ ក្រុមប្រឆាំងកិច្ចព្រមព្រៀងបន្តជជែកវែកញែកពីគោលជំហរស្ទាក់ស្ទើរបស់លោក Khamenei ចំពោះអនុស្សរណៈយោគយល់នេះ ។

សេចក្តីថ្លែងការណ៍ខ្លីមួយដែលសន្មតថាជារបស់លោក Khamenei កាលពីថ្ងៃព្រហស្បតិ៍និយាយថា តាមទ្រឹស្តីបទ ខ្ញុំមានទស្សនៈផ្សេងគ្នា ប៉ុន្តែក្រោយមកលោកបន្តថា លោកឯកភាព បន្ទាប់លោកប្រធានាធិបតី Masoud Pezeshkian ទទួលយកទំនួលខុសត្រូវ ។

កាលពីថ្ងៃអាទិត្យម្សិលមិញ អគ្គនាយករដ្ឋទូរទស្សន៍ IRINN ដែលជាប៉ុស្តិ៍ព័ត៌មានដ៏សំខាន់របស់ទូរទស្សន៍រដ្ឋអ៊ីរ៉ង់ បានលាលែងពីតំណែង ក្រោយស្ថានីយរបស់លោកផ្សាយបទសម្ភាសន៍ផ្ទាល់ជាមួយលោក Mahmoud Nabavian ដែលជាបុព្វជិតរឹងរូស ជាតំណាងរាស្រ្ត និងជាសមាជិកក្រុមចរចាអ៊ីរ៉ង់ អំឡុងជុំដំបូងនៃកិច្ចប្រជុំនៅប្រទេសប៉ាគីស្ថាន កាលពីខែមេសា ។

លោក Khamenei ដែលពុំបានឃើញមុខ ឬឮសំឡេងជាសាធារណៈ ចាប់តាំងពីរូបលោកក្លាយជាមេដឹកនាំកំពូលកាលពីខែមីនានោះ ត្រូវបានគេចោទប្រកាន់ផងដែរថា រូបលោកចង់បានសំណងសង្រ្គាម ការបញ្ចេញទ្រព្យសកម្មបង្កក និងការបដិសេធទាំងស្រុងចំពោះសម្បទានលើកម្មវិធីនុយក្លេអ៊ែរអ៊ីរ៉ង់ ៕