ភ្នំពេញ៖ អង្គការ UNICEF ប្រចាំនៅកម្ពុជា នៅថ្ងៃទី២៧ ខែមេសា ឆ្នាំ ២០២២នេះ បានប្រគល់នូវម៉ាស៊ីនមេ ព្រមទាំងកំព្យូទ័រជាច្រើនគ្រឿងជូន ដល់ក្រសួងសង្គមកិច្ច អតីតយុទ្ធជន និងយុវនីតិសម្បទា ។

អង្គការUNICEF នៅថ្ងៃពុធនេះ បានប្រគល់ជូននូវម៉ាស៊ីនមេមួយគ្រឿង និង កំព្យូទ័រចំនួន ៤៤ គ្រឿងជូនដល់ក្រសួងសង្គមកិច្ច អតីតយុទ្ធជន និងយុវនីតិសម្បទា។ សម្រាប់ការទទួលបាន សម្ភារៈបច្ចេកវិទ្យាទាំងនេះ គឺនឹងប្រើប្រាស់សម្រាប់គាំទ្រដល់ដំណើរការនៃការ អនុវត្តប្រព័ន្ធគ្រប់គ្រងព័ត៌មានកិច្ចការពារកុមារ។ នេះជាការបញ្ជាក់របស់ ឯកឧត្តម តូច ចាន់នី អគ្គនាយកនៃអគ្គនាយកដ្ឋានបច្ចេកទេស ក្រសួងសង្គមកិច្ច។

ឯកឧត្តមបន្តថា បច្ចុប្បន្ននេះ សម្ភារៈទាំងនេះ កំពុងត្រូវបានតម្លើង និងរៀបចំបណ្ដាញ internet ដើម្បីដំណើរការ។ រីឯកំព្យូទ័រវិញ គឺចែកជូនមន្រ្តីបង្គោលដែលគ្រប់គ្រងព័ត៌មានកិច្ច​ការពារ​កុមារ​សម្រាប់​ការបំពេញការងារនានា ​ជាពិសេសការបញ្ចូលទិន្នន័យចូលទៅក្នុងប្រព័ន្ធ។

ឯកឧត្តម ជឿជាក់ថា សម្ភារបច្ចេកវិទ្យាទាំងនេះ នឹងជួយជំរុញគាំទ្រដល់ដំណើរការអនុវត្តប្រព័ន្ធនេះ​កាន់តែមានប្រសិទ្ធភាព ​និងរក្សាបាននូវនិរន្តរភាព ដើម្បីលើកកម្ពស់សិទ្ធិកុមារ និងការពារឧត្តម​ប្រយោជន៍​កុមារគ្រប់រូប ​តាមរយៈកិច្ចសហការ ​និងការចូលរួមយ៉ាងសកម្មពីគ្រប់ភាគីពាក់ព័ន្ធ។

លោកស្រីតំណាង UNICEF លើកឡើងដែរថា ក្រៅពីប្រគល់ជូននូវសម្ភារៈទាំងនេះ UNICEF ក៏នឹងផ្ដល់ការបណ្ដុះបណ្ដាលជំនាញជូនក្រុមបច្ចេកទេសក្រសួងសង្គមកិច្ច ពីការគ្រប់គ្រងនិង​ប្រើប្រាស់​ម៉ាស៊ីនមេនេះ។

លោកស្រីតំណាងUNICEF សម្ដែងការពេញចិត្ត ចំពោះការប្ដេជ្ញានិងការការដឹកនាំ​របស់​ក្រសួង​សង្គមកិច្ច ​ក្នុងការបង្កើតឱ្យ​មានប្រព័ន្ធគ្រប់គ្រងព័ត៌មានកិច្ចការពារកុមារ។

លោកស្រីបន្តថា ​ការបង្កើត​ឱ្យមានប្រព័ន្ធនេះជាកំណែទម្រង់ដ៏សំខាន់មួយ ហើយក៏បង្ហាញពីកិច្ច​សហការនៃអន្តរក្រសួង ​ក៏ដូចជាដៃគូពាក់ព័ន្ធ ហើយក្នុងនាម ​UNICEF គឺមានភាពរួចរាល់ ក្នុងការគាំទ្រ​ជានិច្ចលើការងារមួយនេះ៕អត្ថបទ៖ គឺមហុក