ក្រសួងការពារជាតិរុស្ស៊ីបាននិយាយកាលពីថ្ងៃអាទិត្យថា កងកម្លាំងរុស្ស៊ី បានវាយប្រហារមូលដ្ឋានអាកាសរបស់យោធាអ៊ុយក្រែន និងហេដ្ឋារចនាសម្ព័ន្ធផ្សេងទៀត ខណៈអ៊ុយក្រែននៅថ្ងៃដដែលនោះ បានរាយការណ៍ពីការវាយប្រហារជាបន្តបន្ទាប់ទោលើគោលដៅរុស្ស៊ីជាច្រើនកន្លែង រួមទាំងស្ថានីយរ៉ាដា ឃ្លាំងប្រេងឥន្ធនៈ និងយានយន្តយោធា ក្នុងរយៈពេលមួយថ្ងៃកន្លងទៅនេះ។

ក្រសួងការពារជាតិរុស្ស៊ី បាននិយាយនៅក្នុងរបាយការណ៍ចុងក្រោយរបស់ខ្លួនថា ក្នុងរយៈពេល២៤ ម៉ោងកន្លងទៅនេះ កងទ័ពរុស្ស៊ីបានវាយប្រហារលើមូលដ្ឋានអាកាសរបស់យោធាអ៊ុយក្រែនមួយកន្លែង រួមជាមួយនឹងហេដ្ឋារចនាសម្ព័ន្ធថាមពលនិងដឹកជញ្ជូន និងមជ្ឈមណ្ឌលភស្តុភារ ដែលប្រើប្រាស់ដោយកងកម្លាំងអ៊ុយក្រែន។ របាយការណ៍បាននិយាយបន្ថែមថា ប្រព័ន្ធការពារដែនអាកាសរុស្ស៊ី បានស្ទាក់ចាប់គ្រាប់បែកស៊ីបគោលដៅចំនួន៨គ្រាប់ និងយានដ្រូនរាប់រយគ្រឿង។

យោងតាមរបាយការណ៍បានឲ្យដឹងថា កងនាវាសមុទ្រខ្មៅរបស់រុស្ស៊ី បានបំផ្លាញទូកគ្មានមនុស្សបើកចំនួនបួនគ្រឿងជាកម្មសិទ្ធិរបស់កងកម្លាំងអ៊ុយក្រែននៅភាគនិរតីសមុទ្រខ្មៅ។ នៅក្នុងការធ្វើបច្ចុប្បន្នភាពកាលពីថ្ងៃអាទិត្យ នាយសេនាធិការនៃកងកម្លាំងប្រដាប់អាវុធអ៊ុយក្រែនបាននិយាយថា ការប្រយុទ្ធគ្នារាប់សិបលើកបានកើតឡើងនៅសមរភូមិកាលពីពេលរសៀល។