នៅថ្ងៃចន្ទ (ទី២២ ខែមិថុនា ឆ្នាំ២០២៦)​នេះ លោក Keir Starmer បានប្រកាសថា លោកនឹងលាលែងពីតំណែងនាយករដ្ឋមន្ត្រីអង់គ្លេស បន្ទាប់ពីប្រឈមមុខ​នឹងការបះបោរប្រឆាំង​ នៅក្នុងរង្វង់​គណបក្ស​ការងារឆ្វេងនិយមកណ្ដាល​របស់លោក។

ការប្រកាសនេះអាចបើកផ្លូវឆ្ពោះទៅរកការ​ឡើងកាន់​អំណាច​របស់​អ្នកស្នងតំណែងរបស់​លោក Starmer ដែលទំនងជាលោក Andy Burnham។ ហើយ​នាយករដ្ឋមន្ត្រីបន្ទាប់ នឹងក្លាយជាមេដឹកនាំទី៧ របស់ប្រទេសនេះ ក្នុងរយៈពេល ១ទសវត្សរ៍។

នេះ​បង្ហាញពីការធ្លាក់ចុះដ៏គួរឲ្យ​ភ្ញាក់ផ្អើល សម្រាប់មេដឹកនាំម្នាក់ដែលបានឈ្នះការបោះឆ្នោតក្នុង​សំឡេង​ដ៏លើសលប់ នៅឆ្នាំ២០២៤ ដោយទទួល​បាន​ផល​ពី​ការមិនពេញចិត្តរបស់ប្រជាជន ចំពោះ​ការគ្រប់គ្រងរបស់គណបក្សអភិរក្សនិយមស្តាំនិយមរយៈពេល ១៤ឆ្នាំ។ ប៉ុន្តែជោគវាសនានយោបាយរបស់លោក Starmer បានរងផលប៉ះពាល់ដោយសារ​រឿងអាស្រូវដ៏ធ្ងន់ធ្ងរជាបន្តបន្ទាប់ ខណៈដែលសមាជិកសភាជាច្រើនរបស់លោក បានស្តីបន្ទោសលោកថា មាន​នូវ​កំហុសឆ្គង​គោលនយោបាយ ដែលបានបង្ហាញថា មិនទទួល​បាន​ការគាំទ្រ​យ៉ាងខ្លាំងពី​សាធារណជន។

ការអំពាវនាវឲ្យ​លោក Starmer លាលែងពីតំណែង បាន​មាន​កាន់តែខ្លាំងឡើងៗ ចាប់តាំងពីខែឧសភា នៅពេលដែលបន្ទាប់ពីបាន​ឡើង​កាន់អំណាចបានត្រឹមតែ ២ឆ្នាំ លោកបានដឹកនាំគណបក្សរបស់លោកឲ្យ​ឆ្ពោះ​ទៅរក​លទ្ធផល​ដ៏​អាក្រក់បំផុត នៅក្នុងការបោះឆ្នោតមូល​ដ្ឋាន​ និងតំបន់ ខណៈដែលគណបក្សស្តាំនិយមជ្រុល​ Reform UK របស់លោក Nigel Farage ទទួលបានជ័យជម្នះជាប្រវត្តិសាស្ត្រ។

លោក Starmer វ័យ ៦៣ឆ្នាំ បានប្ដេជ្ញាថា នឹងតទល់​នឹង​ការ​ប្រឆាំងណាមួយ ប៉ុន្តែនៅពេលដែលការរំពឹងទុកកើនឡើងនៅចុងសប្តាហ៍នេះ សូម្បី​ប្រធានាធិបតីអាមេរិក​ លោក​ Donald Trump ក៏​បាន​ចូល​រួម​ការបញ្ចេញ​មតិយោបល់​ផងដែរ។ លោក Trump បានសរសេរ​នៅ​លើបណ្ដាញសង្គម Truth Social ថា៖ «លោក​នាយករដ្ឋមន្ត្រីរូប​នេះ​ បានបរាជ័យយ៉ាងធ្ងន់ធ្ងរ ជុំវិញ​ប្រធានបទសំខាន់២ គឺអន្តោប្រវេសន៍ និងថាមពល។ សូម​​ជូនពរឲ្យ​គាត់ ជោគជ័យ»៕