នាព្រឹកថ្ងៃចន្ទ (ទី២២ ខែមិថុនា ឆ្នាំ២០២៦) នេះ រដ្ឋមន្ត្រីការបរទេសអ៊ីរ៉ង់ លោក Abbas Araghchi បាន​និយាយ​ថា ការចរចាជាមួយសហរដ្ឋអាមេរិក នៅប្រទេសស្វីស ដែលសម្របសម្រួលដោយប្រទេស​ប៉ាគីស្ថាន និងកាតា បាននាំមកនូវវឌ្ឍនដ៏​សំខាន់​ឆ្ពោះទៅរកការបញ្ចប់សង្គ្រាម នៅលីបង់ និងការ​បន្ធូរបន្ថយសម្ពាធ លើសេដ្ឋកិច្ចរបស់​អ៊ីរ៉ង់។

លោក Araghchi បានលើក​ឡើង​តាម​វេទិកាបណ្ដាញ​សង្គម X ថា៖ «ការសម្របសម្រួលដោយ​មិនគិត​ពី​ការ​នឿយហត់របស់ប៉ាគីស្ថាន និងកាតា បានផ្តល់នូវវឌ្ឍនភាពដ៏សំខាន់ ដើម្បីបញ្ចប់សង្គ្រាម នៅ​ប្រទេស​លីបង់។ ការនាំចេញប្រេង និងប្រេងកាត ត្រូវបានលើកលែង ការបិទខ្ទប់​ផ្លូវទឹក​ត្រូវបានដក​ចេញ​ ទ្រព្យសម្បត្តិបង្កក​មួយចំនួនត្រូវបានបញ្ចេញ​ ហើយ​ផែនការកសាងឡើងវិញ និងអភិវឌ្ឍន៍ដ៏ធំ​ ត្រូវ​បាន​ចាប់​ផ្ដើមដំណើរការ​​​សម្រាប់អ៊ីរ៉ង់​»។

គួរបញ្ជាក់​ថា ការកត់សម្គាល់របស់លោកបែប​នេះ បានកើតឡើងភ្លាមៗបន្ទាប់ពីកាតា និងប៉ាគីស្ថាន បានប្រកាសពីវឌ្ឍនភាពដ៏សំខាន់នៅក្នុងកិច្ចប្រឹងប្រែងការទូតដែលកំពុងបន្ត រវាងសហរដ្ឋអាមេរិក និងអ៊ីរ៉ង់ បន្ទាប់ពីបាន​បញ្ចប់កិច្ចចរចាកម្រិតខ្ពស់ជុំទី១ នៅឯកិច្ចប្រជុំកំពូល Lake Lucerne Summit ក្នុងទីក្រុង Burgenstock។

យោងតាមសេចក្តីថ្លែងការណ៍រួម បាន​បង្ហាញ​ថា ភាគីទាំង២ បានឯកភាពគ្នាលើ​ការបង្កើតក្រុមដោះស្រាយជម្លោះ រវាងភាគីពាក់ព័ន្ធ​ សាធារណរដ្ឋលីបង់ និងត្រូវបាន​សម្របសម្រួលដោយអន្តរការី​ ដើម្បីធានាឲ្យ​បាននូវការប្រកាន់ខ្ជាប់​ការបញ្ចប់ប្រតិបត្តិការយោធា នៅលីបង់ ស្របតាមអនុស្សរណៈនៃការយោគយល់គ្នា (MOU)៕