ប្រទេស​កូរ៉េខាងត្បូង នៅ​ថ្ងៃចន្ទ (ទី២២ ខែមិថុនា ឆ្នាំ២០២៦) បានរិះគន់ការ​ដំឡើង​របងព្រំដែន «កាន់តែខ្លាំង» របស់កូរ៉េខាងជើង ដោយចាត់ទុក​ថា ជាការរំលោភលើកិច្ចព្រមព្រៀងបទឈប់បាញ់ដែលបានបញ្ឈប់សង្គ្រាមកូរ៉េ ឆ្នាំ១៩៥០​-៥៣។ នេះបើយោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក​។

ទីភ្នាក់ងារសារព័ត៌មាន Yonhap បានឲ្យ​ដឹង​​ថា ការរិះគន់ពីយោធាកូរ៉េខាងត្បូងនេះ បានកើតឡើងបន្ទាប់ពីមាន​របាយការណ៍មួយ ដែល​ថា របងទាំងនោះត្រូវបានសាងសង់យ៉ាងកៀក​នឹងព្រំដែនអន្តរកូរ៉េ។

ប្រព័ន្ធផ្សព្វផ្សាយក្នុងស្រុក ដោយដកស្រង់ប្រភពយោធា បានរាយការណ៍នៅ​មុននេះ​ថា ទីក្រុងព្យុងយ៉ាងបានដំឡើងរបងលួសបន្លាចម្ងាយត្រឹមតែ ៨០-៩០ម៉ែត្រ ពីខ្សែបន្ទាត់កំណត់ព្រំដែនយោធា (MDL) ដែលខណ្ឌចែក​កូរ៉េទាំង២។

នាយសេនាធិការចម្រុះកូរ៉េខាងត្បូង (JCS) បានឲ្យដឹង​នៅក្នុងសេចក្តីថ្លែងការណ៍មួយថា៖ «ការដំឡើងរបាំងរបស់យោធាកូរ៉េខាងជើងតាមបណ្តោយ MDL គឺជាការរំលោភយ៉ាងច្បាស់លាស់ ជុំវិញកិច្ចព្រមព្រៀងឈប់បាញ់ ហើយយោធារបស់យើងនឹងបន្តឆ្លើយតបដោយសហការយ៉ាងជិតស្និទ្ធជាមួយបញ្ជាការអង្គការសហប្រជាជាតិ (UNC)»។

JCS បានបញ្ជាក់​បន្ថែម​ថា យោធាកំពុងតាមដានយ៉ាងដិតដល់នូវសកម្មភាពយោធារបស់កូរ៉េខាងជើង តាមបណ្តោយតំបន់ព្រំដែន និងរក្សាសន្តិសុខព្រំដែន។ មិនមានប្រតិកម្មភ្លាមៗពីទីក្រុងព្យុងយ៉ាងនោះ​ឡើយ ពាក់​ព័ន្ធ​នឹង​សេចក្តីថ្លែងការណ៍របស់ទីក្រុងសេអ៊ូលនេះ​៕