​សេចក្តីថ្លែងការណ៍ផ្លូវការមួយ បាន​ឲ្យ​ដឹង​ថា អូស្ត្រាលីបានប្រកាសនៅថ្ងៃចន្ទ (ទី២២ ខែមិថុនា ឆ្នាំ​២០២៦) នេះ​ថា ប្រទេស​នេះ​បានចុះហត្ថលេខាលើកិច្ចព្រមព្រៀងនាំចេញការពារជាតិដ៏ធំបំផុតរបស់ខ្លួន ដោយ​កាណាដានឹង​ទិញបច្ចេកវិទ្យារ៉ាដាឃ្លាំមើលក្នុងកិច្ចព្រមព្រៀងតម្លៃ ២,៥ពាន់លានដុល្លារអូស្ត្រាលី (១,៧៥ពាន់លានដុល្លារ)។

រដ្ឋមន្ត្រីក្រសួងការពារជាតិ លោក Richard Marles បានប្រកាសពីកិច្ចព្រមព្រៀងនេះ រួមជាមួយរដ្ឋមន្ត្រីក្រសួងការពារជាតិកាណាដា លោក Stephen Fuhr។

សេចក្តីថ្លែងការណ៍មួយពីការិយាល័យ​របស់​នាយករដ្ឋមន្ត្រីអូស្ត្រាលី លោក Anthony Albanese បានឲ្យ​ដឹង​ថា នេះ​គឺ​ជាការលក់បច្ចេកវិទ្យារ៉ាដារំលង​ជើងមេឃ (Over-the-Horizon) លើកដំបូងរបស់ប្រទេសអូស្ត្រាលី នៅក្រៅប្រទេស ហើយនឹងគាំទ្រដល់ការឃ្លាំមើលតំបន់អាកទិករបស់កាណាដា។

តាម​រយៈ​សេចក្តីថ្លែងការណ៍នោះ លោក Albanese បានលើក​ឡើង​ថា៖ «កិច្ចព្រមព្រៀងថ្ងៃនេះ គឺជាព្រឹត្តិការណ៍ដ៏សំខាន់មួយ នៅក្នុងពាណិជ្ជកម្មការពារជាតិអូស្ត្រាលី ហើយ​បង្កើត​នូវ​គ្រឹះសម្រាប់កិច្ចសហការឧស្សាហកម្មការពារជាតិកាន់តែស៊ីជម្រៅ និងផ្តល់ផលប្រយោជន៍ឲ្យគ្នា​​ទៅវិញទៅមកជាមួយកាណាដា​»។

គួរបញ្ជាក់ថា បណ្តាញរ៉ាដាប្រតិបត្តិការ Jindalee (Jindalee Operational Radar ​Network) របស់អូស្ត្រាលី អាចរកឃើញ និងតាមដានយន្តហោះ នាវា​ និងមីស៊ីល ចម្ងាយរហូតដល់ ៣.០០០គីឡូម៉ែត្រ។ លោក Fuhr បាននិយាយថា បច្ចេកវិទ្យានេះនឹងអាច​ឲ្យ​កាណាដាបង្កើន «ការយល់ដឹងអំពីដែនអាកទិក» របស់ខ្លួនបន្ថែមទៀត៕