រដ្ឋមន្រ្តីក្រសួងសេដ្ឋកិច្ច ផែនការ និងអភិវឌ្ឍន៍ហ្វីលីពីនលោក Arsenio Balisacan និយាយនៅថ្ងៃចន្ទនេះថា កំណើនសេដ្ឋកច្ចហ្វីលីពីនក្នុងឆ្នាំ ២០២៦នេះ នឹងទាបជាងការព្យាករកាលពីមុន ដោយសារវិបត្តិថាមពល និងផលប៉ះពាល់ដោយសាររឿងអាស្រូវពុករលួយដែលបានធ្វើឲ្យយឺតយ៉ាវដល់ការចំណាយរបស់រដ្ឋាភិបាល ។

លោក Balisacan និយាយនៅក្នុងបទសម្ភាសន៍ជាមួយទូរទស្សន៍ One News ថា កំណើនសេដ្ឋកិច្ចឆ្នាំនេះ មានត្រឹម ៣,៥-៤,៥ភាគរយប៉ុណ្ណោះ ពោលគឺទាបជាងការព្យាកររួចរបស់រដ្ឋាភិបាលថា មានចំនួន ៥-៦ភាគរយ ។

លោកថា ការកាត់បន្ថយកំណើនសេដ្ឋកិច្ចនេះ ឆ្លុះបញ្ចាំងពីការចំណាយទាប ដោយសាររឿងអាស្រូវពុករលួយ ពាក់ព័ន្ធនឹងគម្រោងគ្រប់គ្រងគ្រោះទឹកជំនន់ និងអតិផរណាកើនឡើង ដោយសារតម្លៃប្រេងសកលខ្ពស់ជាងមុន ។

សេដ្ឋកិច្ចបានកើនឡើង ២,៨ភាគរយនៅត្រីមាសដំបូងក្នុងឆ្នាំនេះ ពីរយៈពេល ១ឆ្នាំមុន ដែលទាបជាងការព្យាករ ។

ខណៈពេលនោះដែរ ធានាគារកណ្តាល បានដំឡើងអត្រាការប្រាក់នៅជំនួបលើកទី ២ជាប់គ្នា កាលពីសប្តាហ៍មុន គឺជាចំណាត់ការមួយដែលលោក Balisacan និយាយថា វាត្រូវបានបញ្ចូលជាហេតុផល ដើម្បីធានាថា អតិផរណាខ្ពស់មិននៅអចិន្ត្រៃយ៍នោះទេ ។

ស្របពេលដែលអតិផរណាប្រចាំឆ្នាំ ធ្លាក់មកនៅ ៦,៨ភាគរយកាលពីខែឧសភា ពីចំនួន ៧,២ភាគរយ កាលពីរយៈពេល ១ខែមុន វានៅតែស្ថិតនៅពីលើគោលដៅ ៣ភាគរយរបស់ធនាគារកណ្តាលដដែល ៕