មន្ត្រីអាមេរិក បានឲ្យ​ដឹង​ថា ការជម្លៀសចេញជាកាតព្វកិច្ច ត្រូវបានចេញ​កាល​ពី​ថ្ងៃអាទិត្យ (ទី២១ ខែមិថុនា ឆ្នាំ២០២៦) សម្រាប់អ្នក​ស្រុក​រាប់រយនាក់ក្នុងទីក្រុងមួយ នៅភាគ​កណ្តាលរដ្ឋ Utah របស់​សហរដ្ឋ​អាមេរិក​ ខណៈដែលក្រុមអ្នកពន្លត់អគ្គិភ័យ បានប្រឹង​ប្រែង​ទប់​ទល់​នឹងចំហេះ​ព្រៃដែលកំពុងរាលដាលយ៉ាងលឿន ដោយសារ​ខ្យល់បក់ខ្លាំង។

ចំហេះ​ព្រៃឈ្មោះ​ Iron Fire ដែលឆាប​ឆេះនៅតំបន់​ Juab County ចម្ងាយប្រហែល ២៨ម៉ាយល៍ (ប្រមាណ​ជា ៤៥គីឡូម៉ែត្រ) នៅ​ភាគនិរតីនៃទីក្រុង Provo កំពុងគំរាមកំហែងដល់ Eureka ដែលជាទីក្រុងតូចមួយ នៅតំបន់​ភ្នំ East Tintic Mountains។

បើយោងតាមព័ត៌មានព័ត៌មាន​ទីភ្នាក់ងារ​ពន្លត់អគ្គិភ័យ Utah Fire Info បាន​ឲ្យ​ដឹង​ ចំហេះ​ព្រៃនេះ​ ដែលបានឆាបឆេះឡើងកាលពី​យប់ថ្ងៃសុក្រ បានដុត​បំផ្លាញផ្ទៃដីជាង ១៣.៣០០ហិចតា គិត​ត្រឹម​ព្រឹកថ្ងៃអាទិត្យ ហើយនៅតែមិន​ទាន់​អាចគ្រប់គ្រងបាន​សូម្បីតែ​បន្តិច​​។ ចំហេះ​នេះបណ្តាលមកពីមនុស្សជា​អ្នក​បង្ក​ឡើង​ ទោះបីជាអាជ្ញាធរមិនបានបង្ហាញពីអ្វីដែលបណ្ដាល​ឲ្យ​មានការ​ឆាប​ឆេះ​​ព្រៃនេះ​ក៏ដោយ។

ខ្យល់បក់ខ្លាំង និងរុក្ខជាតិស្ងួត បានធ្វើ​ឲ្យ​ចំហេះ​កាន់តែខ្លាំងក្លា កាល​ថ្ងៃសៅរ៍ ដោយបាន​ឆេះរាល​ឆ្ពោះទៅកាន់ទីក្រុង Eureka ជាកន្លែងដែលមន្ត្រីបានចេញបញ្ជាឲ្យ​​ជម្លៀសចេញជាកាតព្វកិច្ច។ អាជ្ញាធរពន្លត់អគ្គិភ័យបានបញ្ជាក់​ថា អណ្តាតភ្លើងកំពុងគំរាមកំហែងដល់ «រចនាសម្ព័ន្ធជាច្រើន» នៅក្នុងតំបន់។ សេវាអាកាសធាតុជាតិបានចេញការព្រមានទង់ក្រហមនៅទូទាំងតំបន់ភាគច្រើន​នៃ​រដ្ឋនេះ​ មុនពេលមានចំហេះ​ព្រៃ​​នេះ​៕