នាថ្ងៃចន្ទ (ទី២២ ខែមិថុនា ឆ្នាំ២០២៦) នេះ ប្រទេសចិនបានជំរុញឲ្យ​សហរដ្ឋអាមេរិក និងអ៊ីរ៉ង់ «ធ្វើការក្នុងទិសដៅដូចគ្នា» ដើម្បីឲ្យ​ទទួល​បាន​ «លទ្ធផលវិជ្ជមាន» បន្ទាប់ពីអ្នកចរចាជាន់ខ្ពស់​នៃភាគីទាំង២ បានជួបប្រជុំគ្នា នៅប្រទេសស្វីស។

អ្នកនាំពាក្យក្រសួងការបរទេស លោក Guo Jiakun បានប្រាប់អ្នកសារព័ត៌មាននៅក្នុងរដ្ឋធានីរបស់​ចិនថា ទីក្រុងប៉េកាំងសង្ឃឹមថា សហរដ្ឋអាមេរិក និងអ៊ីរ៉ង់ «នឹងរក្សាសន្ទុះល្អ ក្នុងការចរចា និងធ្វើការក្នុងទិសដៅដូចគ្នា ដើម្បី​ឲ្យ​ទទួល​បាន​លទ្ធផលវិជ្ជមាន»។

សេចក្តីថ្លែងការណ៍ពីទីក្រុងប៉េកាំងនេះ​ បានកើតឡើងបន្ទាប់ពីប្រទេសប៉ាគីស្ថាន និងកាតា នៅព្រឹកថ្ងៃចន្ទនេះ បានប្រកាសពីវឌ្ឍនដ៏សំខាន់ ​នៅក្នុងកិច្ចប្រឹងប្រែងការទូតដែលកំពុងបន្តមាន រវាងសហរដ្ឋអាមេរិក និងអ៊ីរ៉ង់ បន្ទាប់ពីបាន​បញ្ចប់កិច្ចចរចាកម្រិតខ្ពស់ជុំទី១ នៅឯកិច្ចប្រជុំកំពូល Lake Lucerne Summit ក្នុងប្រទេសស្វីស។

សេចក្តីថ្លែងការណ៍រួមមួយពីអ្នកសម្របសម្រួលទាំង២ បានរៀប​រាប់​ថា៖ «កិច្ចប្រជុំកំពូល Lake Lucerne Summit ត្រូវបានធ្វើឡើងក្នុងបរិយាកាសវិជ្ជមាន និងស្ថាបនា។ វឌ្ឍនភាពលើកទឹកចិត្តត្រូវបានធ្វើឡើង រួមទាំងការបង្កើតយន្តការ សម្រាប់កិច្ចចរចាបច្ចេកទេសបន្ថែមទៀត»។

ហើយ​អ្នកនាំពាក្យក្រសួងការបរទេសចិន លោក Guo បាននិយាយថា៖ «ប្រទេសចិនគាំទ្រប្រទេសប៉ាគីស្ថាន និងកាតា និងភាគីពាក់ព័ន្ធទាំងអស់ ក្នុងកិច្ចប្រឹងប្រែងសម្របសម្រួលរបស់ពួកគេ»។

គណៈប្រតិភូសហរដ្ឋអាមេរិក និងអ៊ីរ៉ង់ ដែលដឹកនាំដោយប្រធានអ្នកចរចារបស់ភាគីទាំង​២ គឺអនុប្រធានាធិបតីសហរដ្ឋអាមេរិក លោក JD Vance និងប្រធានសភាអ៊ីរ៉ង់ លោក Mohammad Baqer Qalibaf បានធ្វើកិច្ចចរចាដោយផ្ទាល់​ជាច្រើនម៉ោងដែលគ្រប់គ្នា​រង់ចាំជាយូរមកហើយ នៅទីក្រុង​ Burgenstock ដើម្បីពិភាក្សាអំពីវិធីអនុវត្តអនុស្សរណៈនៃការយោគយល់គ្នាអ៊ីស្លាម៉ាបាដ (Islamabad MOU) ដែលបានចុះហត្ថលេខាកាលពី​ថ្ងៃទី១៧ ខែមិថុនា៕