ទូរទស្សន៍រដ្ឋចិន CCTV បាន​រាយការណ៍ថា នាវាផ្ទុកយន្តហោះ Liaoning និងនាវាអមដំណើររបស់ប្រទេស​ចិន នៅថ្ងៃចន្ទ (ទី២២ ខែមិថុនា ឆ្នាំ២០២៦) នេះ​ បានវិលត្រឡប់ទៅកាន់កំពង់ផែចិនវិញហើយ​ បន្ទាប់ពីបាន​ធ្វើ​សមយុទ្ធជាង ៤០ថ្ងៃ នៅសមុទ្រចិនខាងត្បូង និងមហាសមុទ្រប៉ាស៊ីហ្វិកភាគ​ខាងលិច។

យោងតាមទូរទស្សន៍ ​​CCTV បានឲ្យដឹងទៀត​ថា ការហ្វឹកហ្វឺននេះផ្តោតលើការត្រៀមខ្លួនប្រយុទ្ធ រួមទាំងការការពារដែនអាកាស ការវាយប្រហារប្រឆាំងនាវា បេសកកម្មគាំទ្រ ការជួយសង្គ្រោះចម្ងាយឆ្ងាយ និងសមយុទ្ធ​បាញ់គ្រាប់ពិត។ ទូរទស្សន៍ដដែល​បាន​ឲ្យ​ដឹង​បន្ត​ថា ក្រុមនាវា​នេះបានធ្វើការហ្វឹកហាត់វាយលុក​បាញ់ពី​នាវាទៅអាកាស និងការពារដែនអាកាសជាច្រើនដង​។

សមយុទ្ធរួមគ្នាជាមួយក្រុមនាវាចម្បាំងទាំង​ក្នុងទឹក​ និង​​លើគោក​ បានក៏ត្រូវបានធ្វើឡើងផង​ដែរ នៅមហាសមុទ្រប៉ាស៊ីហ្វិកភាគ​ខាងលិច ដើម្បីបង្កើនការសម្របសម្រួល ក្នុងប្រតិបត្តិការសមុទ្រឆ្ងាយៗ។

ទូរទស្សន៍ CCTV ក៏បានឲ្យ​ដឹង​ទៀត​ផងដែរថា ក្នុងអំឡុងពេលហ្វឹកហាត់ ក្រុមនាវាផ្ទុកយន្តហោះ Liaoning បានដោះស្រាយដោយ «វិជ្ជាជីវៈ និងប្រុងប្រយ័ត្ន» នូវអ្វីដែលប្រព័ន្ធ​ផ្សព្វផ្សាយនេះ​ហៅថា «ការតាមដានចម្ងាយជិត ការយាយី និងការបង្កហេតុម្តងហើយម្តងទៀត​» ដោយនាវា និងយន្តហោះរបស់ជប៉ុន​៕