បន្ទាប់ពីមាន​កិច្ចចរចានុយក្លេអ៊ែរ រវាងសហរដ្ឋអាមេរិក និងអ៊ីរ៉ង់ជុំទី១ នៅប្រទេសស្វីស អនុប្រធានាធិបតីអាមេរិក លោក JD Vance បានប្រកាសនៅ​ថ្ងៃចន្ទ (ទី២២ ខែមិថុនា ឆ្នាំ២០២៦) នេះថា អ៊ីរ៉ង់បានយល់ព្រមអញ្ជើញអធិការកិច្ចរបស់ទីភ្នាក់ងារថាមពលអាតូមិកអន្តរជាតិ (IAEA) ឲ្យ​ចូលទៅក្នុងប្រទេសវិញ។

សហរដ្ឋអាមេរិកចង់ឲ្យ​កិច្ចចរចាជុំទី១ បញ្ចប់ដោយមាន​ការអញ្ជើញរបស់​អ៊ីរ៉ង់ ដើម្បី​ឲ្យ​អធិការកិច្ចរបស់អង្គការសហប្រជាជាតិ (UN) ទៅមើល​ទីតាំងនុយក្លេអ៊ែរសំខាន់ៗរបស់ខ្លួន ដែលត្រូវបានទម្លាក់គ្រាប់បែកដោយសហរដ្ឋអាមេរិក និងអ៊ីស្រាអែល។ ដំណើរទស្សនកិច្ចបែបនេះចុងក្រោយ បានកើតឡើងមុនសង្គ្រាមក្នុងខែមិថុនា ឆ្នាំ២០២៥។

លោក Vance បានប្រាប់អ្នកសារព័ត៌មាននៅរមណីយដ្ឋាន ក្នុង​ទីក្រុង​ Burgenstock របស់​ប្រទេសស្វីសថា «ប្រទេស​អ៊ីរ៉ង់បានយល់ព្រមអញ្ជើញអធិការ IAEA ត្រឡប់មកប្រទេសរបស់ពួកគេវិញ» ដោយបាន​បន្ថែមថា នេះ «គឺជាព្រឹត្តិការណ៍ដ៏សំខាន់មួយ សម្រាប់ប្រជាជនអាមេរិក និងជាជំហានដំបូង ក្នុងការលុបបំបាត់អាវុធនុយក្លេអ៊ែរជាអចិន្ត្រៃយ៍ ឬបញ្ចប់កម្មវិធីអាវុធនុយក្លេអ៊ែរជាអចិន្ត្រៃយ៍នៅក្នុងប្រទេសអ៊ីរ៉ង់»។

លោក Vance បាន​ឲ្យ​ដឹង​ទៀត​ថា ការសម្របសម្រួល រវាងអ៊ីរ៉ង់ សហរដ្ឋអាមេរិក និង IAEA សម្រាប់ការធ្វើ​ដំណើរបែបនេះ នឹងធ្វើឡើង «នៅ​សប្តាហ៍នេះ ឬប្រហែលជាថ្ងៃ​នេះ​»។ តែ​អ៊ីរ៉ង់មិនទាន់បានបញ្ជាក់នៅឡើយទេ ពាក់ព័ន្ធ​នឹង​ករណីនេះ​។

យ៉ាង​ណាក្ដី លោក Vance មិនបានផ្តល់ព័ត៌មានលម្អិត អំពីប្រភេទនៃលទ្ធភាព​ចូល​របស់​អ្នកត្រួតពិនិត្យ ដែល​នឹងត្រូវបានផ្តល់ឲ្យ​នោះទេ។ លោកបានបញ្ជាក់​ថា ក្រុមបច្ចេកទេសនឹងបន្តការចរចានៅស្វីស បន្ទាប់ពីលោក និងមន្ត្រីជាន់ខ្ពស់ផ្សេងទៀតចាកចេញ៕