អ្នកនាំពាក្យគណៈកម្មការអឺរ៉ុប បាននិយាយនៅ​ថ្ងៃចន្ទ (ទី២២ ខែមិថុនា ឆ្នាំ២០២៦) នេះថា សហភាពអឺរ៉ុប (EU) កំពុងវាយតម្លៃឡើងវិញថា តើត្រូវធ្វើកិច្ចប្រជុំកំពូលជាមួយចក្រភពអង់គ្លេសតាមការគ្រោងទុកនៅថ្ងៃទី២២ ខែកក្កដា ដែរ ឬយ៉ាង​ណា បន្ទាប់ពីនាយករដ្ឋមន្ត្រីអង់គ្លេសលោក Keith Starmer បានប្រកាស​ថា លោកនឹងលាលែងពីតំណែង។

អ្នកនាំពាក្យបានបញ្ជាក់​ថា៖ «ទំនាក់ទំនងរបស់យើងជាមួយចក្រភពអង់គ្លេស គឺ និងនឹងនៅតែរឹងមាំ​ដដែល​»។ អ្នកនាំពាក្យរូប​នេះ​បានបន្ថែមទៀត​​ថា «ចំពោះចម្ងល់​ពាក់ព័ន្ធ​នឹង​កិច្ចប្រជុំកំពូលសហភាពអឺរ៉ុប-ចក្រភពអង់គ្លេស ដោយសារ​មាន​ការប្រកាស​លាលែងពីតំណែងរបស់លោកនាយករដ្ឋមន្ត្រី Starmer យើងកំពុងវាយតម្លៃឡើងវិញជាមួយ (ក្រុមប្រឹក្សាអឺរ៉ុប) លោក​ប្រធាន Antonio Costa និងចក្រភពអង់គ្លេស អំពីឱកាសនៃការណ៍ដែល​កិច្ចប្រជុំកំពូលនៅ​តែ​ប្រព្រឹត្ត​ទៅបាន ដូចដែលត្រូវបានប្រកាសកាលពីសប្តាហ៍មុន»។

នៅមុន​នេះ ប្រធានគណៈកម្មការអឺរ៉ុប លោកស្រី Ursula von der Leyen បានសរសើរលោក Starmer។ លោកស្រីបានលើកឡើង​នៅក្នុងការបង្ហោះមួយលើបណ្ដាញ​សង្គម X ថា៖ «វាអាចចំណាយពេលច្រើនឆ្នាំ ដើម្បីឲ្យ​មេដឹកនាំជាច្រើន​ក្លាយជារដ្ឋបុរស តែ​អ្នក (លោក Starmer) ​ធ្វើបាន​ក្នុងរយៈពេលត្រឹមតែ ២ឆ្នាំប៉ុណ្ណោះ។ សន្តិសុខអឺរ៉ុប និងអ៊ុយក្រែនកាន់តែរឹងមាំដោយសារតែអ្នក»៕