គណៈកម្មការប្រឆាំងអំពើពុករលួយម៉ាឡេស៊ី(MACC) បានបើកការស៊ើបអង្កេតករណីចោទប្រកាន់ថា ការទូរទាត់ប្រាក់ពាក់ព័ន្ធនឹងការផ្ទេរសត្វដំរី ៣ក្បាលចេញពីសួនសត្វនៅរដ្ឋ Perak ប្រទេសម៉ាឡេស៊ី ទៅកាន់ប្រទេសជប៉ុន ពុំបានទៅដល់រដ្ឋាភិបាលនោះទេ ស្របពេលមានអំណះអំណាងពាក់ព័ន្ធនឹងប្រតិបត្តិការតម្លៃប្រហែល ១២លានដុល្លារ ។

សារព័ត៌មានក្នុងស្រុក Malay Mail រាយការណ៍ថា កាលពីខែមីនាកន្លងទៅ ដំរី ៣ក្បាល ឈ្មោះ Dara, Amoi និង Kelat ត្រូវបានផ្លាស់ទីជម្រកចេញពីសួនសត្វ Taiping ទៅកាន់សួនសត្វ Tennoji ស្ថិតក្នុងទីក្រុង Osaka ក្រោមកិច្ចព្រមព្រៀងអភិរក្ស និងស្រាវជ្រាវរយៈពេល ២៥ឆ្នាំ រវាងស្ថាប័នទាំង ២ ។

កាសែត Free Malaysia Today រាយការណ៍ថា ការស៊ើបអង្កេតផ្តោតសំខាន់លើក្រសួងធនធាន និងនិរន្តរភាពបរិស្ថានជាតិ នាយកដ្ឋានឧទ្យាជាតិ និងសត្វព្រៃ ហើយនិងភ្នាក់ងារពាក់ព័ន្ធនឹងការផ្ទេរសត្វដំរីទាំងនេះ ។

ការស៊ើបអង្កេតនេះដែរ បានកើតមាន បន្ទាប់ពីការចោទប្រកាន់លើកឡើងរបស់ក្រុមសិទ្ធិសត្វព្រៃ Hidup កាលពីថ្ងៃទី ១៨ ខែមិថុនា ដែលបានអះអាងថា ការទូរទាត់ជាច្រើនក្នុងករណីនេះ ពុំបានទៅដល់រដ្ឋាភិបាលម៉ាឡេស៊ីនោះទេ តែបែរជាធ្លាក់ទៅក្នុងកណ្តាប់ដៃរបស់មនុស្សជាច្រើនដែលជាប់ពាក់ព័ន្ធនឹងប្រតិបត្តិការតម្លៃប្រហែល ១២លានដុល្លារនេះ ៕