ប្រទេសចិន នៅ​ថ្ងៃចន្ទ (ទី២២ ខែមិថុនា ឆ្នាំ២៩២៦) នេះ បានបង្ហាញ​បំណងប្រាថ្នាចង់ពង្រឹងទំនាក់ទំនងជាមួយបង់ក្លាដែស ខណៈដែលនាយករដ្ឋមន្ត្រីនៃប្រទេសនេះ លោក Tarique Rahman គ្រោងនឹងទៅបំពេញទស្សនកិច្ចនៅចិន ចាប់ពីថ្ងៃពុធ ដល់ថ្ងៃសុក្រ ក្នុង​សប្ដាហ៍នេះ​។

អ្នកនាំពាក្យក្រសួងការបរទេសចិន លោក Guo Jiakun បានប្រាប់អ្នកសារព័ត៌មានថា៖ «តាមរយៈដំណើរទស្សនកិច្ចនេះ ប្រទេសចិនទន្ទឹងរង់ចាំធ្វើការជាមួយរដ្ឋាភិបាលថ្មីរបស់ប្រទេសបង់ក្លាដែស ដើម្បីបង្កើនទំនាក់ទំនងជាយុទ្ធសាស្ត្រ បន្តមិត្តភាពប្រពៃណី ជំរុញកិច្ចសហប្រតិបត្តិការខ្សែក្រវ៉ាត់ និងផ្លូវគុណភាពខ្ពស់ ពង្រីកការផ្លាស់ប្តូរ និងកិច្ចសហប្រតិបត្តិការក្នុងវិស័យផ្សេងៗ និងបង្កើនការសម្របសម្រួលលើកិច្ចការពហុភាគី ដើម្បីនាំឲ្យ​ភាពជាដៃគូយុទ្ធសាស្ត្រដ៏ទូលំទូលាយ រវាងចិន និងបង់ក្លាដែស ចូល​ទៅកាន់កម្រិតថ្មីមួយ»។

លោក Guo បានបន្ថែមថា នេះនឹងជាដំណើរទស្សនកិច្ចលើកដំបូងរបស់លោក Rahman មកកាន់ប្រទេសចិន ចាប់តាំងពីលោកឡើងកាន់តំណែងកាលពីខែកុម្ភៈ។ ដំណើរទស្សនកិច្ចនេះធ្វើឡើងក្រោយ​ការ​បញ្ចប់ដំណើរទស្សនកិច្ចក្រៅប្រទេសលើកដំបូងរបស់លោក Rahman នៅ​ម៉ាឡេស៊ី។

ក្នុងអំឡុងពេលនៃដំណើរទស្សនកិច្ចនេះ លោក Rahman នឹងជួបជាមួយប្រធានាធិបតី លោក Xi Jinping នាយករដ្ឋមន្ត្រី លោក​ Li Qiang និងសមាជិកសភាជាន់ខ្ពស់ លោក​ Zhao Leji ដើម្បីពិភាក្សាអំពីទំនាក់ទំនងទ្វេភាគី ក៏ដូចជាបញ្ហាអន្តរជាតិ និងតំបន់ដែលមានផលប្រយោជន៍ទៅវិញទៅមក៕